फलटण : भाजप प्रदेश नेतृत्वाच्या सूचनेनुसार फलटणमध्ये आज गाव बस्ती संपर्क अभियानाची उत्साहात सुरुवात करण्यात आली. या अभियानाचा शुभारंभ खासदार रणजितसिंह नाईक निंबाळकर यांच्या प्रमुख उपस्थितीत झाला.
या प्रसंगी जिल्हा सरचिटणीस जयकुमार शिंदे, वाठार स्टेशन मंडळ अध्यक्ष अमित रणवरे, कोळकी मंडळ अध्यक्ष लक्ष्मण सोनवलकर, फलटण मंडळ अध्यक्ष बापुराव शिंदे, माजी अध्यक्ष बजरंग गावडे, जिल्हा उपाध्यक्ष संदीप चोरमले, सरचिटणीस संतोष सावंत, नगरसेवक सुधीर अहिवळे, युवा मोर्चा अध्यक्ष संतोष गावडे, पंचायत समिती सदस्य संजय कापसे, अजय माळवे आदी पदाधिकारी उपस्थित होते.
यावेळी उपस्थितांना मार्गदर्शन करताना खासदार रणजितसिंह नाईक निंबाळकर म्हणाले की, “पंतप्रधान नरेंद्र मोदी व मुख्यमंत्री देवेंद्र फडणवीस यांच्या नेतृत्वाखाली केंद्र व राज्य शासनाच्या विविध योजना तळागाळापर्यंत पोहोचवण्याचा प्रयत्न प्रत्येक कार्यकर्त्याने करावा. अभियानात सहभागी होऊन प्रत्येक बुथ अध्यक्ष, प्रमुख नेते व कार्यकर्त्यांनी गावागावात जाऊन मंदिरे स्वच्छ करावीत, शाळा, दवाखाने, ग्रामपंचायत कार्यालयांना भेटी द्याव्यात व गावातील लाभार्थ्यांशी थेट संपर्क साधावा,” असे आवाहन त्यांनी केले.
या अभियानाची माहिती जिल्हा सरचिटणीस जयकुमार शिंदे यांनी दिली. जिल्ह्यातील प्रत्येक मंडळ अध्यक्ष आणि आघाडी-मोर्च्यांच्या पदाधिकाऱ्यांनी या अभियानात सक्रीय सहभाग नोंदवावा, असे आवाहनही त्यांनी केले.
कार्यक्रमाच्या शेवटी युवा मोर्चाचे अध्यक्ष संतोष गावडे यांनी उपस्थितांचे आभार मानले.
