[ad_1]
ठाणे : गेल्या महिन्याभरापासून कापूरबावडी आणि माजिवडा चौकातील कोंडीला कारणीभूत ठरणारा कापूरबावडी चौकातील बंद उड्डाणपूल अखेर आठवड्याभरात सुरु होण्याची शक्यता आहे. या पूलावर मेट्रो मार्गिकेच्या निर्माणाचे काम सुरु असल्याने हा पूल वाहतुकीसाठी बंद होता. येथील वाहतुक कोंडीमुळे नागरिक अक्षरश: हैराण झाले आहेत. पुल खुला झाल्यास नागरिकांना मोठा दिलासा मिळणार आहे.घोडबंदर, कोलशेत, बाळकूम, ढोकाळी आणि भिवंडी या भागातील वाहतुकीसाठी कापूरबावडी चौक अत्यंत महत्त्वाचा आहे. या चौकात एक उड्डाणपूल आहे. घोडबंदर भागात वाहतुक करणाऱ्या हलक्या वाहनांसाठी हा पुल महत्त्वाचा आहे. दुसरीकडे गेल्याकाही वर्षांपासून ठाणे- घाटकोपर- वडाळा (मेट्रो चार) या मार्गिकेच्या निर्माणाचे काम शहरात सुरू आहे. या कामांसाठी शहरात रस्त्याकडेला किंवा दुभाजकांमध्ये मेट्रोचे खांब उभारले जात आहे.
सर्वाधिक रहदारीचा भाग कापूरबावडी चौक असल्याने येथील मार्गावरील मेट्रोचे खांब सर्वांत शेवटच्या टप्प्यात उभारण्याचा निर्णय मुंबई महानगर प्रदेश विकास प्राधिकरणाने घेतला होता. त्यानुसार, मागील महिन्याभरापासून कापूरबावडी आणि माजिवडा चौकात मेट्रो मार्गिकेच्या निर्माणाची कामे सुरू आहे. येथील चौकातील उड्डाणपूलाची वाहतुकही त्यासाठी बंद करण्यात आली आहे. त्याचा परिणाम घोडबंदर, पोखरण रोड क्रमांक दोन, कोलशेत, बाळकूम आणि भिवंडीच्या दिशेने वाहतुक करणाऱ्या हजारो वाहन चालकांना सहन करावा लागत आहे. मागील महिन्याभरापासून सुरु असलेल्या या वाहतुक कोंडीमुळे नागरिक हैराण झाले आहेत. अनेकदा माजिवडा ते कापूरबावडी हे जेमतेम दोन ते तीन मिनीटांचे अंतर पार करण्यासाठी वाहन चालकांना सुमारे २० ते २५ मिनीटे लागतात. अखेर येथील कामे पूर्ण होण्याच्या मार्गावर आहेत. येथील खांब उभारण्यात आले असून लवकरच तुळई (गर्डर) या मार्गावर उभारले जाणार आहेत. येत्या काही दिवसांत ही कामे देखील पूर्ण होण्याची शक्यता आहे. त्यामुळे आठवड्याभरात हा उड्डाणपूल सुरु करण्याचे नियोजन असल्याचे वाहतुक पोलीस दलातील एका अधिकाऱ्याने सांगितले.
[ad_2]
Source link
