96 तास उलटूनही संजीवराजे नाईक निंबाळकरांच्या घरावरील आयकर विभागाची कारवाई सुरूच; पुण्यातील चौक

फलटण : विधानपरिषदेचे माजी सभापती रामराजे नाईक निंबाळकर यांचे बंधू संजीवराजे नाईक निंबाळकर (Sanjeevraje Naik Nimbalkar) आणि रघुनाथराजे नाईक निंबाळकर यांच्या घरावरील आयकर विभागाची कारवाई अद्यापही सुरूच आहे. संजीवराजे नाईक निंबाळकर यांच्या निवासस्थानी ५ फेब्रुवारीला सकाळी 6 वाजण्याच्या सुमारास आयकर विभागाने छापे टाकले होते. आयकर विभागाने छापे टाकलेल्या पहिल्या दिवशी संजीवराजे (Sanjeevraje Naik Nimbalkar) यांची तब्बल 17 तास चौकशी केली होती. त्यानंतर सलग दुसऱ्या दिवशीही चौकशी करण्यात आली. शुक्रवारी पुन्हा सकाळी लवकरच सुरू झालेली चौकशी रात्री उशिरापर्यंत सुरूच होती. अजून दोन दिवस चौकशी सुरू राहील, असे रघुनाथराजे निंबाळकर यांनी सांगितले होते. त्याचप्रमाणे तब्बल 96 तास उलटले तरी अद्याप आयकर विभागाची कारवाई सुरूच आहे.

आजचा आयकर विभागाच्या कारवाईचा पाचवा दिवस आहे. आज ही कारवाई संपू शकते असं देखील बोललं जातं आहे. फलटण येथील संजीवराजे (Sanjeevraje Naik Nimbalkar) आणि रघुनाथराजे नाईक निंबाळकर यांच्या घरावरती बुधवारी आयकर विभागाने छापा टाकला होता. तेव्हापासून सुरू झालेली चौकशी आज पाचव्या दिवशी देखील सुरूच आहे. गेल्या काही दिवसांमध्ये ते राष्ट्रवादी काँग्रेस अजित पवारांच्या पक्षात प्रवेश करणार अशी चर्चा सुरू होती, मात्र या दरम्यानच्या काळातच त्यांच्या घरावर आयकर विभागाने छापा मारला. बुधवारी पासून सुरू झालेली कारवाई अद्याप सुरूच आहे. आयकर विभागाच्या चौकशीमध्ये काय समोर आलं हे अद्याप समजू शकलेलं नाही. मात्र, संजीवराजे नाईक निंबाळकर वारंवार सांगताना दिसत आहेत, या चौकशीतून काहीही समोर येणार नाही. 

पुण्यातील चौकशी तब्बल 50 तासानंतर संपली

संजीवराजे नाईक निंबाळकर (Sanjeevraje Naik Nimbalkar) यांच्या निवासस्थानासह पुण्यातील घरावरती आयकर विभागाने चौकशी केली. पुण्यातील लक्ष्मी या निवासस्थानी सुरू असलेली आयकर विभागाची चौकशी तब्बल 50 तासांनंतर संपली आहे. या चौकशीमध्ये कोणत्याही प्रकारचा संशयित व्यवहार आढळला नसल्याची माहिती समोर आली आहे. या चौकशीला नाईक निंबाळकर कुटुंबीयांनी पूर्णपणे सहकार्य केले आहे. मात्र, पुण्यातील चौकशी संपली असली, तरीही फलटण येथील चौकशी मात्र अजूनही सुरूच आहे. आयकर विभागाच्या अधिकाऱ्यांनी छापे टाकल्यापासून संजीवराजे नाईक निंबाळकर यांच्या कार्यकर्त्यांनी गेली चार दिवस त्यांच्या निवासस्थानाबाहेर गर्दी केली आहे. संजीवराजेंच्या पत्नी शिवांजलीराजे नाईक-निंबाळकर आणि सुपूत्र सत्यजीतराजेंनी काल (शनिवारी, ता. 8) कार्यकर्त्यांशी संवाद साधला. सुदैवानं आज कारवाई संपेल. थोडं पेपर वर्क बाकी आहे, असं सांगत त्यांनी कारवाई रात्री संपणार असल्याची शक्यता वर्तवली आहे.

अधिक पाहा..