शिक्षणाची ताकद! ज्या ऑफिसमध्ये होता शिपाई, आता तिथेच अधिकारी; वडिलांनीही ठोकला सलाम

Shailendra Kumar Bandhe: नॅशनल इंस्टिट्यूट ऑफ टेक्नॉलॉजी (एनआईटी) रायपूरमध्ये बी.टेक केलेले आणि राज्य लोकसेवा आयोगाच्या (सीजीपीएससी) कार्यालयात शिपाई म्हणून कार्यरत असलेल्या शैलेंद्रकुमार बांधे यांनी कठोर परिश्रमाने राज्य लोकसेवा परीक्षा उत्तीर्ण करून अधिकारी होण्याचं स्वप्न पूर्ण केलं आहे. या परीक्षेची तयारी करणाऱ्या राज्यातील अनेक तरुणांसाठी शैलेंद्रकुमार बांधे हे प्रेरणादायी ठरले आहेत.

शैलेंद्रकुमार बांधे यांनी पाचव्या प्रयत्नात सीजीपीएससी-2023 परीक्षा उत्तीर्ण केली आहे. या परीक्षेचे निकाल गेल्या आठवड्यात जाहीर झाले आहेत. त्यांना जनरन कॅटेगरीत 73 वी रँक आणि रिझर्व्ह कॅटेगरीत दुसरी रँक मिळाली आहे. शैलेंद्रकुमार बांधे यांनी आपल्या आई-वडिलांच्या मदतीशिवाय हे करु शकलो नसतो, ज्यांनी प्रत्येक निर्णयात साथ दिली असं सांगितलं आहे. 

शैलेंद्रकुमार बांधे म्हणाले, “माझी या वर्षी मे महिन्यात CGPSC कार्यालयात शिपाई म्हणून नियुक्ती झाली होती. त्यानंतर मी यावर्षी फेब्रुवारीमध्ये झालेल्या CGPSC-2023 च्या प्राथमिक परीक्षेत उत्तीर्ण झालो. त्यानंतर मी मुख्य परीक्षेची तयारी सुरू ठेवली कारण मला अधिकारी व्हायचं होतं”.

अनुसूचित जाती समाजातील बांधे हे राज्यातील बिलासपूर जिल्ह्यातील बिटकुली गावातील शेतकरी कुटुंबातील आहेत. आता ते रायपूरला स्थायिक झाले आहेत. बांधे यांनी सांगितलं की, त्यांनी रायपूरमध्ये शालेय शिक्षण पूर्ण केले आणि नंतर नॅशनल इन्स्टिट्यूट ऑफ टेक्नॉलॉजी (एनआयटी) रायपूर येथे यांत्रिक अभियांत्रिकीमध्ये बीटेकचे शिक्षण घेतले.

एका नामांकित संस्थेतून अभियांत्रिकी पूर्ण केल्यानंतर, त्यांना अनेक खासगी कंपन्यांमध्ये नोकरी मिळू शकली असती, परंतु सरकारी नोकरीची इच्छा असल्याने त्यांनी ‘प्लेसमेंट इंटरव्ह्यू’ला न जाण्याचा निर्णय घेतला.

बांधे म्हणाले की, त्यांना एनआयटी रायपूर, हिमाचल साहूमधील त्यांच्या एका सुपर सीनियरकडून प्रेरणा मिळाली, ज्याने CGPSC-2015 परीक्षेत प्रथम क्रमांक मिळविला होता. ते म्हणाले, “मी पहिल्याच प्रयत्नात पूर्व परीक्षेत नापास झालो आणि पुढच्या प्रयत्नात मी मुख्य परीक्षा पास करू शकलो नाही. तिसऱ्या आणि चौथ्या प्रयत्नात मी मुलाखतीसाठी पात्र झालो, पण तो पास करू शकलो नाही. शेवटी, पाचव्या प्रयत्नात मला यश मिळालं”.

“सीजीपीएससी परीक्षेची तयारी करण्यासाठी मी एक वर्ष घालवलं. कुटुंबाला आर्थिक मदत करण्याची गरज असल्याने मला शिपायाची नोकरी निवडावी लागली. त्याच वेळी मी राज्य नागरी सेवा परीक्षेची तयारीही करत होतो,” असं त्यांनी सांगितलं आहे. 

शिपाई म्हणून काम करताना तुमची गैरसोय व्हायची का? असं विचारलं असता ते म्हणाले, “कोणतीही नोकरी मोठी किंवा लहान नसते, कारण प्रत्येक पदाची स्वतःची प्रतिष्ठा असते. मग तो शिपाई असो वा उपजिल्हाधिकारी, प्रत्येक कामात प्रामाणिकपणे आणि पूर्ण जबाबदारीने काम करावं लागतं”.

“काही लोक मला शिपायाचे काम करत असल्याबद्दल टोमणे मारायचे आणि माझी चेष्टा करायचे. पण मी त्यांच्याकडे लक्ष दिलं नाही. माझे आई-वडील, कुटुंब आणि कार्यालयाने मला नेहमीच पाठिंबा दिला आणि मला प्रेरणा दिली,” असं ते म्हणाले आहेत. 

बांधे यांचे वडील संतराम बांधे हे शेतकरी आहेत. आपल्या मुलाच्या मेहनतीला आणि समर्पणाला सलाम करतो, अशी भावना त्यांनी व्यक्त केली आहे. तो अधिकारी होण्यासाठी गेली पाच वर्षे तयारी करत होता. अपयश आल्यानंतरही त्याने हार मानली नाही. मला आशा आहे की माझा मुलगा सरकारी नोकरी मिळवण्यासाठी आणि देशसेवा करण्यासाठी कठोर परिश्रम करणाऱ्या सर्वांसाठी प्रेरणा बनेल असं ते म्हणाले आहेत.