मुधोजी महाविद्यालयात रंगलेल्या युवा प्रतिभेच्या सोहळ्याची दिमाखात सांगता; विवेकानंद कॉलेजने पटकावले सर्वसाधारण विजेतेपद!

शिवाजी विद्यापीठाचा ४६ वा मध्यवर्ती युवा महोत्सव उत्साहात संपन्न; कला, संस्कृती आणि सर्जनशीलतेचा फलटणमध्ये अविस्मरणीय संगम

फलटण प्रतिनिधी | साहस Times  विद्यार्थ्यांच्या कलागुणांना नवी दिशा, सर्जनशीलतेला व्यापक व्यासपीठ आणि सांस्कृतिक परंपरांना आधुनिकतेची जोड देणाऱ्या शिवाजी विद्यापीठाच्या ४६ व्या मध्यवर्ती युवा महोत्सवाची फलटण येथील मुधोजी महाविद्यालयात उत्साहपूर्ण वातावरणात सांगता झाली. ६ ते ९ ऑक्टोबरदरम्यान आयोजित या महोत्सवात राज्यभरातील महाविद्यालयीन विद्यार्थ्यांनी संगीत, नृत्य, नाट्य, साहित्य आणि ललित कलांच्या माध्यमातून आपल्या प्रतिभेचे प्रभावी दर्शन घडविले. या स्पर्धेत कोल्हापूरच्या विवेकानंद कॉलेजने वैयक्तिक व समूह गटातील सर्वसाधारण विजेतेपद पटकावून उल्लेखनीय यश संपादन केले.

समारोप सोहळ्यास शिवाजी विद्यापीठाचे कुलसचिव डॉ. व्ही. एन. शिंदे प्रमुख पाहुणे म्हणून उपस्थित होते, तर महाराष्ट्र विधान परिषदेचे माजी सभापती श्रीमंत रामराजे नाईक निंबाळकर यांनी अध्यक्षस्थान भूषविले. फलटण बाजार समितीचे चेअरमन श्रीमंत रघुनाथराजे नाईक निंबाळकर यांची प्रमुख उपस्थिती होती.

‘शिका, वाचा आणि जिंका’ हा संदेश विद्यार्थ्यांनी जीवनात उतरवावा!

विद्यार्थ्यांना मार्गदर्शन करताना कुलसचिव डॉ. व्ही. एन. शिंदे यांनी शिवाजी विद्यापीठाच्या नावातून ‘शि’ म्हणजे शिका, ‘वा’ म्हणजे वाचा आणि ‘जी’ म्हणजे जिंका, असा प्रेरणादायी संदेश दिला. विद्यार्थ्यांनी केवळ शैक्षणिक प्रगतीपुरते मर्यादित न राहता कला आणि सांस्कृतिक क्षेत्रातही आपले कौशल्य सिद्ध करावे, असे आवाहन त्यांनी केले.

विद्यार्थ्यांच्या कलागुणांना प्रोत्साहन देण्यासाठी विद्यापीठ आणि संलग्न महाविद्यालये विविध संधी उपलब्ध करून देत आहेत. मुधोजी महाविद्यालयात आयोजित हा महोत्सव अनेक अर्थांनी ऐतिहासिक ठरल्याचेही त्यांनी नमूद केले.

लोककलेच्या सादरीकरणाने समारोपाला रंगत

समारंभाची सुरुवात शिवाजी विद्यापीठाच्या कलाकारांनी सादर केलेल्या दमदार लोकवाद्यवृंदाने झाली. विद्यापीठाला सुवर्णपदक मिळवून देणाऱ्या या सादरीकरणाला उपस्थितांनी उत्स्फूर्त दाद दिली. त्यानंतर इचलकरंजी येथील धनंजयराव कदम कला, विज्ञान व वाणिज्य महाविद्यालयाच्या विद्यार्थ्यांनी ‘डोले कुणी ते’ हे लोकनृत्य सादर करून वातावरणात उत्साह निर्माण केला.

मुधोजी महाविद्यालयाचे प्राचार्य प्रा. डॉ. पी. एच. कदम यांनी प्रास्ताविकातून चार दिवसांत पार पडलेल्या विविध स्पर्धांचा आढावा घेतला. या महोत्सवामुळे विद्यार्थ्यांना स्वतःमधील कला, कौशल्य आणि सर्जनशीलता सादर करण्याची संधी मिळाल्याचे त्यांनी सांगितले.

या वेळी शिवाजी विद्यापीठातील कलाकार किरण भाजीभाकरे आणि आदित्य घाडशी यांनी श्रीमंत रामराजे नाईक निंबाळकर व श्रीमंत रघुनाथराजे नाईक निंबाळकर यांची पेन्सिल स्केचेस तयार करून त्यांना भेट दिली. या कलाकृती समारंभाचे विशेष आकर्षण ठरल्या. स्पर्धक संपदा जगताप आणि संघ व्यवस्थापक आरिफ महात यांनीही आपले अनुभव व्यक्त केले.

सांस्कृतिक वारसा जपत नव्या विचारांना स्वीकारा!

अध्यक्षीय मनोगतात श्रीमंत रामराजे नाईक निंबाळकर यांनी युवा कलाकारांनी आपल्या सांस्कृतिक परंपरांचे जतन करावे आणि आधुनिक सर्जनशीलतेच्या माध्यमातून त्या अधिक प्रभावीपणे जगासमोर मांडाव्यात, असे आवाहन केले. परंपरेचा अभिमान आणि नव्या विचारांची सांगड घातल्यास कला अधिक समृद्ध होईल, असा संदेश त्यांनी दिला.

विद्यार्थी विकास विभागाचे प्रभारी संचालक प्रा. डॉ. एस. जी. घाणे यांनी महोत्सवाच्या आयोजनाची माहिती दिली, तर विद्यापीठाच्या व्यवस्थापन परिषद सदस्य डॉ. आर. व्ही. गुरव यांनी विद्यार्थ्यांना मार्गदर्शन केले.

विजेत्या महाविद्यालयांचा गौरव

महोत्सवात विविध कलाप्रकारांमध्ये महाविद्यालयांनी उल्लेखनीय कामगिरी केली.

• विवेकानंद कॉलेज, कोल्हापूर : वैयक्तिक व समूह गटातील सर्वसाधारण विजेतेपदासह संगीत, नाट्य व नृत्य विभागांतील शताब्दी महोत्सव चषक आणि लोककला फिरता चषक.
• सद्गुरू गाडगे महाराज कॉलेज, कराड : कला विभागातील शताब्दी महोत्सव चषक, वैयक्तिक गटात उपविजेतेपद तसेच सातारा जिल्ह्यात वैयक्तिक व समूह गटांत विजेतेपद.
• शाहूजी लॉ कॉलेज, कोल्हापूर : साहित्य विभागातील शताब्दी महोत्सव चषक, समूह गटात उपविजेतेपद आणि कोल्हापूर जिल्ह्यात वैयक्तिक गटात विजेतेपद.
• धनंजयराव कदम कला, विज्ञान व वाणिज्य महाविद्यालय, इचलकरंजी : लोकनृत्याचा फिरता चषक.
• शिक्षणमहर्षी डॉ. बापूजी साळुंखे कॉलेज, मिरज : सांगली जिल्ह्यात वैयक्तिक गटात विजेतेपद.
• श्रीमती कस्तुरबाई वालचंद कॉलेज ऑफ आर्ट्स अँड सायन्स, मिरज : सांगली जिल्ह्यात समूह गटात विजेतेपद.

या यशामुळे विद्यार्थ्यांच्या कलात्मक कौशल्यांना आणि महाविद्यालयीन सांस्कृतिक चळवळीला नवी ऊर्जा मिळाली.

मान्यवरांची उपस्थिती आणि आयोजकांचे योगदान

या सोहळ्यास कुलसचिव डॉ. व्ही. एन. शिंदे, डॉ. आर. व्ही. गुरव, प्रा. डॉ. एस. जी. घाणे, प्रा. डॉ. बी. एस. सातपुते, प्राचार्य डॉ. जाधव, सांस्कृतिक विभागप्रमुख प्रा. डॉ. सुरेखा अडके, कोल्हापूर जिल्हा समन्वयक आर. एच. अत्रिग्रे, सातारा जिल्हा समन्वयक डॉ. देवानंद सोनटक्के, युवा महोत्सव समन्वयक डॉ. टी. पी. शिंदे, फलटण एज्युकेशन सोसायटीचे प्रशासन अधिकारी अरविंद निकम, संस्थेचे पदाधिकारी आणि ज्येष्ठ पत्रकार अरविंदभाई मेहता यांच्यासह विविध मान्यवर उपस्थित होते.

शिवाजी विद्यापीठाचे कुलगुरू प्रा. डॉ. आर. के. कामत, फलटण एज्युकेशन सोसायटीचे सचिव श्रीमंत संजीवराजे नाईक निंबाळकर आणि प्रा. डॉ. पी. डी. बच्छाव यांनी महोत्सवाला शुभेच्छा दिल्या.

कार्यक्रमाचे सूत्रसंचालन प्रा. संग्राम निंबाळकर आणि प्रा. निलम देशमुख यांनी केले. महोत्सवाचे समन्वयक व सांस्कृतिक विभागप्रमुख प्रा. लक्ष्मीकांत वळेकर यांनी आभार मानले.

विद्यार्थ्यांच्या कलागुणांना वाव देणारा, सांस्कृतिक वैविध्याची ओळख करून देणारा आणि फलटणच्या शैक्षणिक क्षेत्राचा गौरव वाढविणारा हा युवा महोत्सव संस्मरणीय ठरला. मुधोजी महाविद्यालयातील प्राध्यापक, कर्मचारी आणि आयोजन समितीच्या परिश्रमातून हा सांस्कृतिक सोहळा यशस्वीरीत्या पार पडला.