कार्याध्यक्ष संजय दिनकर खरात व नेते उमेश गायकवाड यांची माहिती; पात्र पदवीधरांनी लोकशाही प्रक्रियेत सहभागी होण्याचे आवाहन
फलटण | प्रतिनिधी :महाराष्ट्र विधान परिषदेच्या पुणे विभाग पदवीधर मतदारसंघाच्या निवडणुकीच्या पार्श्वभूमीवर पात्र पदवीधर मतदारांनी मतदार यादीत आपले नाव नोंदवावे, असे आवाहन कास्ट्राईब शिक्षक संघटनेचे कार्याध्यक्ष संजय दिनकर खरात व संघटनेचे नेते उमेश गायकवाड यांनी केले आहे.
पुणे विभाग पदवीधर मतदारसंघामध्ये पुणे, सातारा, सांगली, कोल्हापूर आणि सोलापूर या जिल्ह्यांचा समावेश होतो. या मतदारसंघासाठी निवडणूक कार्यक्रम जाहीर झाला असून २३ ऑक्टोबर २०२६ रोजी मतदान होणार आहे. पात्र पदवीधरांना मतदार यादीत नाव नोंदविण्यासाठी २६ सप्टेंबर २०२६ पर्यंत संधी असल्याची माहिती प्रशासनाकडून देण्यात आली आहे.
कास्ट्राईब शिक्षक संघटनेच्या पदाधिकाऱ्यांनी सांगितले की, पदवीधर मतदारसंघाची निवडणूक ही सर्वसाधारण विधानसभा निवडणुकीपेक्षा वेगळी असून त्यासाठी स्वतंत्र मतदार यादी असते. त्यामुळे पात्र पदवीधरांनी आपले नाव या मतदार यादीत आहे की नाही, याची खात्री करणे आवश्यक आहे. पुणे विभागाची अंतिम पदवीधर मतदार यादी जानेवारी २०२६ मध्ये प्रसिद्ध करण्यात आली असून त्यानंतरही पात्रतेनुसार मतदार नोंदणीची प्रक्रिया सुरू ठेवण्यात आली आहे.
ऑनलाइन नोंदणीची सुविधा
पुणे विभागीय आयुक्त कार्यालयाच्या अधिकृत संकेतस्थळावर पदवीधर मतदारसंघासाठी फॉर्म क्रमांक १८ तसेच ऑनलाइन नोंदणीची सुविधा उपलब्ध करून देण्यात आली आहे. पात्र मतदारांनी आवश्यक कागदपत्रांसह अर्ज प्रक्रिया पूर्ण करावी, असे आवाहन करण्यात आले आहे.
संजय दिनकर खरात आणि उमेश गायकवाड यांनी पदवीधर युवक, शिक्षक, कर्मचारी, व्यावसायिक तसेच पात्र सर्व नागरिकांनी मतदार नोंदणीबाबत उदासीन न राहता आपला सहभाग नोंदवावा, असे आवाहन केले. मतदार यादीत नाव नोंदविणे ही लोकशाहीतील महत्त्वाची प्रक्रिया असून, पात्र मतदारांनी अंतिम मुदतीपूर्वी आवश्यक कार्यवाही करावी, असे त्यांनी स्पष्ट केले.
कास्ट्राईब शिक्षक संघटनेचा संदेश
“पात्र आहात, तर मतदार यादीत नाव नोंदवा; आपला मताधिकार जपा आणि लोकशाही प्रक्रियेत सक्रिय सहभाग नोंदवा,” असे आवाहन कास्ट्राईब शिक्षक संघटनेच्या वतीने करण्यात आले आहे.
