गोकुळच्या आधुनिक कार्यपद्धतीचे श्रीमंत संजीवराजेंकडून कौतुक
दुग्ध व्यवसायातील अत्याधुनिक प्रकल्पांची घेतली सविस्तर माहिती
फलटण (प्रतिनिधी): महाराष्ट्रातील सहकार क्षेत्रात अग्रगण्य ठरलेल्या कोल्हापूर जिल्हा सहकारी दूध उत्पादक संघाच्या “गोकुळ” डेअरीला गोविंद मिल्क अँड मिल्क प्रॉडक्ट्स प्रा. लि.चे संस्थापक व चेअरमन श्रीमंत संजीवराजे नाईक निंबाळकर यांनी सदिच्छा भेट देत संस्थेच्या कार्यपद्धतीचे विशेष कौतुक केले. यावेळी त्यांनी दुग्ध व्यवसायातील आधुनिक प्रकल्प, पशुसंवर्धन योजना आणि शेतकरी हिताच्या विविध उपक्रमांची माहिती घेत समाधान व्यक्त केले.
गोकुळचे कार्यकारी संचालक डॉ. योगेश गोडबोले यांनी संस्थेच्या विविध प्रकल्पांची सविस्तर माहिती दिली. दूध उत्पादक शेतकऱ्यांसाठी राबविण्यात येणाऱ्या योजना, आधुनिक दूध प्रक्रिया तंत्रज्ञान, पशुवैद्यकीय सेवा, चारा विकास प्रकल्प तसेच महिला सक्षमीकरणासाठी सुरू असलेल्या उपक्रमांबाबत माहिती देण्यात आली. यावेळी प्रशासक मंडळ अध्यक्ष तथा जिल्हा निबंधक संजयकुमार सुद्रिक, सहाय्यक निबंधक सुनील धायगुडे आणि विविध विभागांचे अधिकारी उपस्थित होते.
गोकुळ डेअरीकडे सध्या दररोज १७ लाख लिटर दूध प्रक्रिया क्षमता असून उपग्रह दुग्ध प्रकल्प, शीतकरण केंद्रे, आधुनिक पॅकिंग युनिट आणि पशुखाद्य प्रकल्प कार्यरत आहेत. शेतकऱ्यांसाठी मोबाईल पशुवैद्यकीय सेवा, एआय केंद्रे, चारा बँक, बायोगॅस योजना, महिला नेतृत्व विकास कार्यक्रम आणि कार्बन क्रेडिटसारखे नाविन्यपूर्ण उपक्रमही यशस्वीपणे राबवले जात आहेत.
संस्थेला “सहकार भूषण”, राष्ट्रीय उत्पादकता पुरस्कार, ऊर्जा बचत पुरस्कार यांसह अनेक मानाचे पुरस्कार प्राप्त झाले असून ISO प्रमाणपत्रांमुळे गुणवत्ता व्यवस्थापनातही गोकुळने वेगळी ओळख निर्माण केली आहे. आर्थिक वर्ष २०२४-२५ मध्ये संस्थेची उलाढाल तब्बल ३९६६ कोटी रुपयांपर्यंत पोहोचली असून ६२ कोटी लिटरहून अधिक दूध हाताळण्यात आले आहे.
याच पार्श्वभूमीवर श्रीमंत संजीवराजे नाईक निंबाळकर यांनी फलटणमधील गोविंद मिल्कच्या स्थापनेपासून झालेल्या प्रगतीचाही आढावा घेतला. सन १९९५-९६ मध्ये सुरू झालेल्या गोविंद मिल्कने आज सात जिल्ह्यांतील ८०० गावांमधील २५ हजारांहून अधिक दूध उत्पादकांना जोडले आहे. दररोज साडेसहा ते सात लाख लिटर दूध संकलन करणाऱ्या या संस्थेने शेतकऱ्यांच्या विश्वासावर मोठे जाळे उभे केले आहे.
गोविंद मिल्कने गुणवत्तेला सर्वोच्च प्राधान्य देत अँटीबायोटिक्स, केमिकल रेसिड्यू आणि अॅफलाटॉक्सिन तपासणीची कठोर अंमलबजावणी सुरू केली आहे. तसेच मुक्त संचार गोठे, चारा निर्मिती केंद्र, कालवड संगोपन, बायोगॅस प्रकल्प आणि महिलांसाठी विशेष प्रशिक्षण यांसारख्या योजनांमुळे फलटण तालुक्यात दुग्ध व्यवसाय हा प्रमुख व्यवसाय म्हणून विकसित होत असल्याचेही यावेळी अधोरेखित करण्यात आले.
