नेपाळमध्ये भारतीय सॉफ्ट हॉकी संघाची दमदार कामगिरी; नेपाळ व भूतानचा धुव्वा
फलटण प्रतिनिधी : नेपाळ येथील काठमांडूच्या इनडोअर स्टेडियमवर सुरू असलेल्या आंतरराष्ट्रीय सॉफ्ट हॉकी स्पर्धेत भारतीय संघाने शानदार खेळाचे प्रदर्शन करत आपले निर्विवाद वर्चस्व कायम राखले आहे. भारतीय संघाने सलग दोन सामन्यांत दणदणीत विजय मिळवत प्रतिस्पर्धी संघांना अक्षरशः धूळ चारली.
पहिल्या सामन्यात भारताने यजमान नेपाळ संघाचा तब्बल 6-0 अशा एकतर्फी फरकाने पराभव केला. या सामन्यात भारतीय खेळाडूंनी आक्रमक खेळ, वेगवान पासिंग आणि उत्कृष्ट बचावफळीच्या जोरावर सुरुवातीपासूनच सामन्यावर पकड ठेवली. भारतीय संघाच्या आक्रमणापुढे नेपाळचा बचाव पूर्णपणे निष्प्रभ ठरला.
त्यानंतर झालेल्या दुसऱ्या सामन्यात भारताने भूतान संघावरही 5-0 अशी प्रभावी मात केली. या सामन्यातही भारतीय खेळाडूंनी उत्कृष्ट समन्वय आणि शिस्तबद्ध खेळ करत प्रतिस्पर्ध्यांना एकही गोल करण्याची संधी दिली नाही.
या सलग विजयामुळे भारतीय संघाचा आत्मविश्वास उंचावला असून आता सर्वांचे लक्ष उद्या होणाऱ्या भारत विरुद्ध पाकिस्तान या अत्यंत रोमांचक सामन्याकडे लागले आहे. हा सामना उद्या सकाळी 11.00 वाजता रंगणार असून दोन्ही देशांतील क्रीडाप्रेमींमध्ये मोठी उत्सुकता निर्माण झाली आहे.
भारताचा संघ सध्या उत्कृष्ट फॉर्ममध्ये असून पाकिस्तानविरुद्धही दमदार कामगिरी करत विजयाची परंपरा कायम राखण्याचा निर्धार खेळाडूंनी व्यक्त केला आहे.
