माकडाच्या नवजात पिल्लाला मिळाले जीवदान; काकडे बंधूंची मानवतेची हृदयस्पर्शी कृती
फलटण :- माकडाच्या नवजात पिल्लाला मिळाले जीवदान; काकडे बंधूंची मानवतेची हृदयस्पर्शी कृती
फलटण शहरातील स्वामी विवेकानंद नगर परिसरात मानवतेचे प्रेरणादायी उदाहरण पाहायला मिळाले आहे. उमेश काकडे आणि त्यांचे बंधू योगेश काकडे यांनी जखमी अवस्थेत आढळलेल्या माकडाच्या नवजात पिल्लाचे प्राण वाचवून समाजासमोर एक आदर्श निर्माण केला आहे.
मिळालेल्या माहितीनुसार, एका झाडावरून पडल्यामुळे हे नवजात माकडाचे पिल्लू गंभीर जखमी अवस्थेत रस्त्याच्या कडेला आढळून आले. पिल्लाची आई जवळपास असली तरी पिल्लू हालचाल करू शकत नव्हते. ही बाब लक्षात येताच उमेश काकडे आणि योगेश काकडे यांनी तत्काळ पुढाकार घेत पिल्लाला सुरक्षित ठिकाणी हलवले.
यानंतर त्यांनी अथक प्रयत्न करून Global Earth Foundation चे सदस्य मंगेश कर्वे यांना घटनास्थळी बोलावले. पिल्लाला त्यांच्या ताब्यात देण्यात आले आणि पुढील उपचारासाठी वन विभागाकडे सुपूर्द करण्यात आले. स्थानिक पशुवैद्यकीय डॉक्टरांनी पिल्लावर प्राथमिक उपचार करून त्याची प्रकृती स्थिर केली.
काही वेळातच पिल्लामध्ये हालचाल दिसू लागली, ज्यामुळे ते सुरक्षित असल्याची खात्री पटली. या घटनेमुळे परिसरात आनंदाचे वातावरण निर्माण झाले असून, काकडे बंधूंच्या या कार्याचे सर्वत्र कौतुक होत आहे.
ही घटना मानव आणि वन्यजीव यांच्यातील सहअस्तित्वाचे महत्त्व अधोरेखित करणारी ठरली असून, समाजात मदतीची आणि संवेदनशीलतेची भावना अधिक बळकट करणारी आहे.
