फलटण : महात्मा शिक्षण संस्थेच्या सचिव तथा फलटण नगर परिषदेच्या माजी नगरसेविका सौ. वैशालीताई कृष्णाथ (दादासाहेब) चोरमले यांना सन २०२०-२१ चा “पुण्यश्लोक राजमाता अहिल्यादेवी होळकर जिल्हास्तरीय पुरस्कार” प्रदान करून गौरविण्यात आले. महाराष्ट्र दिनानिमित्त सातारा येथील शाहू स्टेडियमवर आयोजित शासकीय ध्वजारोहण सोहळ्यानंतर पालकमंत्री ना. शंभूराज देसाई यांच्या हस्ते हा सन्मान करण्यात आला.
या वेळी जिल्हाधिकारी संतोष पाटील, पोलीस अधीक्षक पिंगळे, जिल्हा परिषद मुख्य कार्यकारी अधिकारी याशनी नागराजन, महिला व बालविकास अधिकारी शिल्पा पाटील तसेच जिल्ह्यातील विविध लोकप्रतिनिधी, अधिकारी, कर्मचारी व नागरिक उपस्थित होते.
ठाकूरकी (ता. फलटण) येथील महात्मा शिक्षण संस्थेच्या मूकबधीर विद्यालयाच्या माध्यमातून वैशालीताई चोरमले यांनी केलेल्या उल्लेखनीय सामाजिक कार्याची दखल घेत महाराष्ट्र शासनाच्या महिला व बालविकास विभागाने त्यांची या पुरस्कारासाठी निवड केली होती.
मूकबधीर विद्यार्थ्यांना दर्जेदार शिक्षणाबरोबरच लघुउद्योग, क्रीडा, संगीत व कला क्षेत्राचे प्रशिक्षण देऊन स्वावलंबी बनविण्यासाठी त्यांनी मोठे योगदान दिले आहे. स्वतःच्या निधीतून विद्यालयासाठी सुसज्ज इमारत, क्रीडांगण, वसतीगृह, स्कूल बस तसेच आवश्यक शैक्षणिक सुविधा उपलब्ध करून दिल्या. विद्यार्थ्यांना क्रीडा स्पर्धांमध्ये सहभागी होण्यासाठी प्रोत्साहन देत त्यांना यशस्वी बनविण्यातही त्यांनी मोलाची भूमिका बजावली.
गेल्या अनेक वर्षांपासून चोरमले दाम्पत्य मूकबधीर विद्यार्थ्यांच्या सर्वांगीण विकासासाठी प्रयत्नशील असून, शासकीय अनुदानाशिवाय वसतीगृह चालवणे, शिक्षकांचे प्रशिक्षण याकडेही त्यांनी विशेष लक्ष दिले आहे. नगरसेविका म्हणूनही त्यांनी फलटण शहरातील विशेषतः महिलांच्या समस्या सोडविण्यासाठी ठोस भूमिका घेतली.
या पुरस्काराबद्दल पालकमंत्री ना. शंभूराज देसाई, आ. श्रीमंत रामराजे नाईक निंबाळकर, श्रीमंत रघुनाथराजे नाईक निंबाळकर, श्रीमंत संजीवराजे नाईक निंबाळकर, श्रीमंत सौ. शिवांजलीराजे नाईक निंबाळकर यांच्यासह विविध मान्यवरांनी त्यांचे अभिनंदन केले आहे.
