फलटणमध्ये प्रधानमंत्री आवास योजना (शहरी) २.० ला वेग; १२३० घरकुलांचे उद्दिष्ट, नागरिकांना पुढे येण्याचे आवाहन
फलटण : केंद्र शासनाच्या प्रधानमंत्री आवास योजना (शहरी) २.० अंतर्गत फलटण शहरात घरकुल वितरण प्रक्रियेला गती मिळत आहे. या योजनेतील लाभार्थी नेतृत्व बांधकाम (BLC) घटकांतर्गत फलटण नगरपरिषदेकडे आतापर्यंत एकूण २१० अर्ज प्राप्त झाले असून, त्यापैकी ९९ घरकुलांना मंजुरी देण्यात आली आहे.
मंजूर लाभार्थ्यांना गृहनिर्माण व शहरी विकास मंत्रालय, भारत सरकार यांच्याकडून आर्थिक सहाय्य दिले जात असून, आतापर्यंत सुमारे ३५ लाख रुपयांचे अनुदान वितरित करण्यात आले आहे. यामुळे आर्थिकदृष्ट्या दुर्बल घटकांना स्वतःचे पक्के घर मिळविण्याचे स्वप्न साकार होण्यास मदत होत आहे.
फलटण शहरासाठी या योजनेअंतर्गत शासनाने एकूण १२३० घरकुलांचे उद्दिष्ट निश्चित केले आहे. मात्र, सध्या अर्जांची संख्या कमी असल्याने हे उद्दिष्ट पूर्ण करण्यासाठी अधिकाधिक पात्र नागरिकांनी पुढे येणे गरजेचे आहे. शहरातील गरजू व आर्थिकदृष्ट्या दुर्बल नागरिकांना स्वतःचे सुरक्षित व पक्के घर उपलब्ध करून देणे, हा या योजनेचा मुख्य हेतू आहे.
फलटण नगरपरिषदेचे मुख्याधिकारी मा. निखील जाधव तसेच नगराध्यक्ष मा. समशेरसिंह नाईक निंबाळकर यांनी नागरिकांना आवाहन करताना सांगितले की, “ही योजना सर्व पात्र नागरिकांसाठी एक मोठी संधी आहे. जास्तीत जास्त लोकांनी अर्ज करून शासनाच्या या उपक्रमाचा लाभ घ्यावा.”
योजनेविषयी अधिक माहिती, पात्रता निकष तसेच अर्ज प्रक्रिया जाणून घेण्यासाठी नागरिकांनी फलटण नगरपरिषद येथील प्रधानमंत्री आवास योजना कक्षाला भेट देऊन मार्गदर्शन घ्यावे, असेही आवाहन करण्यात आले आहे.
