करुणा, मैत्री आणि धम्मभावनेतून आयु. बाबासाहेब जगताप यांचा वाढदिवस उत्साहात साजरा
फलटण : भारतीय बौद्ध महासभा, फलटण तालुक्याचे माजी सरचिटणीस, श्रामणेर तथा बौद्ध धम्माचे अभ्यासक व प्रचारक आयु. बाबासाहेब दिलीप जगताप यांचा वाढदिवस धम्ममय वातावरणात मोठ्या उत्साहात साजरा करण्यात आला.
या प्रसंगी बोलताना भारतीय बौद्ध महासभा शाखा फलटण तालुक्याचे माजी अध्यक्ष आयु. महावीर भालेराव म्हणाले की, जगताप सर हे रयत शिक्षण संस्थेचे आदर्श शिक्षक असून लहानांपासून मोठ्यांपर्यंत भगवान गौतम बुद्धांची करुणा जोपासणारे व्यक्तिमत्त्व आहेत. विद्यार्थ्यांवर मनापासून प्रेम करणारे, प्रत्येकाच्या सुख-दुःखात सहभागी होणारे तसेच शिव, शाहू, फुले, आंबेडकर विचारांचे गाढे अभ्यासक व छत्रपती शिवाजी महाराजांचा सत्य इतिहास सांगणारे प्रभावी वक्ते म्हणून त्यांची ओळख आहे. त्यांनी जगताप सरांना वाढदिवसानिमित्त शुभेच्छा दिल्या.
भारतीय बौद्ध महासभा शाखा फलटण तालुक्याचे माजी संस्कार उपाध्यक्ष आयु. बजरंग गायकवाड म्हणाले की, जगताप सर हे डॉ. बाबासाहेब आंबेडकर यांच्या विचारांचे खरे पाईक आहेत. त्यांच्या कार्यात त्यांच्या सुविद्य पत्नी पारिजातका मॅडम यांची मोठी साथ लाभली असून संपूर्ण कुटुंबाची जबाबदारी सांभाळत त्यांनी सरांच्या जडणघडणीत मोलाचा वाटा उचलला आहे. त्यांनी आपल्या परिवाराच्या वतीने शुभेच्छा व्यक्त केल्या.
यावेळी कार्यालयीन सचिव चंद्रकांत मोहिते यांनी जगताप सरांचे आदर्श शिक्षक व मार्गदर्शक म्हणून कौतुक करताना, ते सर्वांच्या सुख-दुःखात धावून जाणारे, मदतीचा हात देणारे आणि हसमुख स्वभावाचे व्यक्तिमत्त्व असल्याचे सांगितले. त्यांनी बुद्ध, धम्म व संघ यांच्या बलाने सरांना उत्तम आरोग्य व दीर्घायुष्य लाभावे, अशा शुभेच्छा दिल्या.
माजी कोषाध्यक्ष आयु. विठ्ठल निकाळजे यांनी सांगितले की, रयत शिक्षण संस्थेच्या कर्मवीर भाऊराव पाटील विद्यालय, बिजवडी येथे कार्यरत असलेले जगताप सर हे एक आदर्श व्यक्तिमत्त्व असून त्यांना वाढदिवसानिमित्त मनःपूर्वक शुभेच्छा देत असल्याचे त्यांनी नमूद केले.
तसेच प्रचार व पर्यटन विभागाचे माजी उपाध्यक्ष रामचंद्र मोरे म्हणाले, जगताप सर समता सैनिक, उत्तम बौद्धाचार्य, आदर्श शिक्षक व गायक म्हणून सुपरिचित आहेत. धम्माचा प्रचार प्रसार करण्यामध्ये हे त्यांचे योगदान अतुल्यनीय आहे. भारतीय बौद्ध महासभेच्या वतीने गेली अनेक वर्ष होते धम्माचा विचार जनसामान्यांमध्ये रुजवण्याचं काम करतात. त्यांना मी वाढदिवसानिमित्त मंगलमय शुभेच्छा देतो.
यावेळी आयु. बाबासाहेब दिलीप जगताप यांच्या सुविद्य पत्नी म्हणाल्या, आमच्या सरांनी स्वतःपेक्षा माझ्या शिक्षणाला, माझ्या विचारांना कायमच प्रोत्साहन दिले आहे. समाजामध्ये बौद्ध धम्माचा विचार रुजवण्यामध्ये, प्रचार व प्रसारामध्ये ते कायमच प्रयत्नशील असतात. माझ्या कुटुंबीयांचा तसेच माझ्या वडिलांचा त्यांच्यावर प्रचंड विश्वास होता. त्याने कायमच एक कुटुंब वत्सल व्यक्तिमत्व म्हणून माझ्या सासरी व माहेरी दोन्ही ठिकाणी जबाबदाऱ्या पार पाडल्या आहेत. त्यांना उत्तम आरोग्य व दीर्घायुष्य लाभावे, त्यांच्या हातून अशीच समाजाची सेवा घडावी एवढीच मी इच्छा व्यक्त करते. व त्यांना वाढदिवसाच्या मनःपूर्वक शुभेच्छा देते.
यावेळी भारतीय सैन्य दलातील फौजी आयु.विकास गायकवाड, भारतीय बौद्ध महासभा शाखा सातारा जिल्हा पूर्व संस्कार सचिव सोमीनाथ घोरपडे, आयु अविनाश अहिवळे, आयुनि संध्या अहिवळे, आयुनि अश्विनी मोरे यांनी ही मंगलमय शुभेच्छा दिल्या.
या कार्यक्रमाला विविध मान्यवर, सहकारी, मित्रपरिवार व धम्मप्रेमी मोठ्या संख्येने उपस्थित होते. कार्यक्रम धम्ममय वातावरणात पार पडला.
