फलटण प्रतिनिधी : फलटण पंचायत समितीच्या सभापतीपदाच्या निवडणुकीत ओबीसी प्रवर्गासाठी आरक्षित असलेल्या पदावर कुणबी-मराठा दाखला असलेल्या सदस्याची बिनविरोध निवड झाल्याने तालुक्यात राजकीय वातावरण चांगलेच तापले आहे. ओबीसी प्रवर्गासाठी राखीव असलेल्या पदावर अशा प्रकारे निवड झाल्यामुळे ओबीसी समाजातील विविध संघटनांनी नाराजी व्यक्त केली असून या निर्णयावरून राजकीय वर्तुळात तीव्र चर्चा सुरू झाली आहे.
मिळालेल्या माहितीनुसार, पंचायत समितीतील सभापतीपद हे ओबीसी प्रवर्गासाठी आरक्षित होते. मात्र निवड प्रक्रियेदरम्यान कुणबी-मराठा दाखला असलेल्या सदस्याची बिनविरोध निवड करण्यात आली. या निर्णयामुळे ओबीसी समाजाच्या प्रतिनिधित्वावर गदा आली असल्याचा आरोप स्थानिक ओबीसी कार्यकर्त्यांकडून केला जात आहे. या पार्श्वभूमीवर “OBC से पंगा महंगा पडेगा” अशी चर्चा राजकीय वर्तुळात रंगू लागली आहे.
दरम्यान, या घडामोडींवर नाराजी व्यक्त करत भाजप फलटण तालुका ओबीसी सेलचे अध्यक्ष तसेच विडणी गावचे लोकनियुक्त सरपंच सागर अभंग यांनी आपल्या पदाचा राजीनामा देण्याचा निर्णय घेतल्याची माहिती समोर आली आहे. ओबीसी समाजाच्या हक्कांशी तडजोड होत असल्याची भावना व्यक्त करत त्यांनी हा निर्णय घेतल्याचे सांगितले जात आहे. त्यामुळे हा वाद आणखी तीव्र होण्याची चिन्हे दिसत आहेत.
याचवेळी मराठा समाजाच्या आरक्षणाच्या मागणीच्या संदर्भातही या प्रकरणाची चर्चा सुरू झाली आहे. मराठा क्रांती मोर्चाच्या माध्यमातून मराठा समाजासाठी आरक्षणाची मागणी करताना मनोज जरांगे पाटील यांनी अनेकदा जाहीरपणे मराठा समाजाला आरक्षण हे शिक्षण व नोकरीपुरतेच हवे असल्याचे स्पष्ट केले होते. मात्र फलटण पंचायत समितीतील ओबीसी आरक्षणाच्या पदावर कुणबी-मराठा दाखल्याच्या आधारे सदस्याची निवड झाल्यामुळे या भूमिकेवर प्रश्नचिन्ह उपस्थित केले जात असल्याची चर्चा आहे.
या प्रकरणामुळे फलटण तालुक्यासह सातारा जिल्ह्यातील ओबीसी संघटनांमध्ये नाराजी वाढत असल्याचे दिसून येत आहे. आगामी काळात या मुद्द्यावरून राजकीय वातावरण अधिकच तापण्याची शक्यता वर्तवली जात असून संबंधित निर्णयावर पुनर्विचार करण्याची मागणीही काही संघटनांकडून केली जात आहे.
