फलटण : – राज्यसभेसाठी रणजितसिंह नाईक निंबाळकर यांच्या नावाची शिफारस; कार्यकर्त्यांत उत्साह
भारतीय जनता पक्षच्या कोअर कमिटीची महत्त्वपूर्ण बैठक मुख्यमंत्री देवेंद्र फडणवीस यांच्या निवासस्थानी रात्री उशिरा पार पडली. या बैठकीत राज्यसभेच्या चार जागांसाठी तब्बल २५ जणांच्या नावांची शिफारस केंद्रीय नेतृत्वाकडे करण्यात आली आहे.
या शिफारशीमध्ये मुख्यमंत्री फडणवीस यांचे निकटवर्तीय आणि माजी खासदार रणजितसिंह नाईक निंबाळकर यांच्या नावाचाही समावेश असल्याची माहिती समोर आली आहे. त्यामुळे त्यांच्या उमेदवारीची शक्यता अधिक बळावली असून कार्यकर्त्यांमध्ये उत्साहाचे वातावरण आहे.
रणजितसिंह नाईक निंबाळकर यांनी यापूर्वी माढा लोकसभा मतदारसंघ येथून निवडणूक लढवून लोकसभेत प्रतिनिधित्व केले होते. मागील लोकसभा निवडणुकीत त्यांचा पराभव झाला असला तरी त्यांनी खचून न जाता संघटनबांधणीवर भर दिला. त्यांच्या नेतृत्वाखाली विधानसभेसाठी आमदार सचिन पाटील यांना विजयी करण्यात त्यांनी महत्त्वाची भूमिका बजावली.
तसेच, फलटण नगर परिषद येथे तब्बल ३३ वर्षांनंतर सत्तांतर घडवून भाजपची सत्ता स्थापन करण्यात त्यांचा मोलाचा वाटा राहिला आहे. फलटण पंचायत समितीमध्येही प्रथमच आठ सदस्य निवडून आणण्यात यश आले असून सभापतीपदाची निवडणूक अद्याप बाकी आहे.
पक्षाने सोपवलेल्या प्रत्येक जबाबदारीचे त्यांनी यशस्वीपणे पालन केले असल्याने राज्यसभा निवडणूक जाहीर होताच त्यांच्या नावाची चर्चा कार्यकर्त्यांमध्ये सुरू झाली होती. आता कोअर कमिटीने अधिकृत शिफारस केल्याने रणजितसिंह नाईक निंबाळकर यांनाच उमेदवारी मिळेल, असा विश्वास भाजप कार्यकर्त्यांकडून व्यक्त केला जात आहे.
