बारामती :- बारामती तालुक्यातील सोमेश्वरनगर परिसरात एक धक्कादायक प्रकार उघडकीस आला असून, एका महाविद्यालयीन विद्यार्थीनीशी प्रेमसंबंध स्थापून तिचे अश्लील व्हिडिओ बनवून व्हायरल करण्याची धमकी देणाऱ्या सहा जणांविरोधात वडगाव निंबाळकर पोलिस ठाण्यात गंभीर गुन्हा दाखल करण्यात आला आहे. या प्रकारामुळे परिसरात खळबळ उडाली आहे.
ही घटना १६ जानेवारी २०२५ ते २९ जून २०२५ दरम्यान घडली. या प्रकरणी पार्थ शिंदे (रा. किल्लज, ता. तुळजापूर), रोहन चाबुकस्वार (रा. करंजेपुल, ता. बारामती), सुरज दत्तात्रय भोसले (रा. पुणे), हनुमंत शिंदे (रा. लातूर), विजय मोजगे (रा. किल्लज), तुषार जगदाळे (पत्ता अज्ञात) या सहा जणांविरुद्ध पीडित १९ वर्षीय विद्यार्थिनीने दिलेल्या फिर्यादीवरून गुन्हा दाखल झाला आहे.
घटनाक्रम असा उलगडला…
डिसेंबर २०२४ मध्ये फिर्यादीच्या मैत्रिणीने तिची ओळख पार्थ शिंदे या आरोपीशी करून दिली. त्यानंतर त्यांच्यात फोनवरून बोलणं सुरु झालं आणि मैत्री झाली. १३ जानेवारी २०२५ रोजी वाढदिवसाच्या दिवशी ‘हॅशटॅग कॅफे’ नीरा येथे दोघांनी एकत्र फोटो घेतले.
१६ जानेवारी रोजी कॉलेजमध्ये पार्थने पीडितेला प्रेमाचे नाटक करत शरीरसंबंधांची मागणी केली. तिने नकार दिल्यानंतर त्याने पाठलाग सुरु केला. करंजेपूल येथील ‘द कॉफी कॅफे’मध्ये भेटीत त्याने नकळत व्हिडिओ शूट केला आणि तिचा विनयभंग केला. पुढे व्हॉट्सअॅप कॉलवर कपडे काढण्यास भाग पाडून नग्न व्हिडिओ तयार केला आणि ब्लॅकमेल करण्यास सुरुवात केली.
पार्थ शिंदे याने वेगवेगळ्या नंबरवरून पीडितेच्या बहिणीला, नातेवाईकांना वाढदिवसाचे फोटो, मित्रांसोबतचे फोटो तसेच अश्लील व्हिडिओ पाठवले. २९ जून रोजी सहआरोपींनी पीडितेच्या कुटुंबीयांना फोन करून, ती अनेक मुलांशी संबंध ठेवते, असा खोटा प्रचार करत बदनामी केली. रोहन चाबुकस्वारने तर पीडितेला थेट फोन करून शिवीगाळ व धमकी दिल्याचे फिर्यादीत नमूद आहे.
गुन्हेगारी कलमे आणि कायदेशीर कारवाई
वडगाव निंबाळकर पोलिसांनी भारतीय न्याय संहिता कलम ७४, ७५(१), ७८, ७९, ३५२, ३५१(२), ३५१(३), ३(५) तसेच अनुसूचित जाती-जमाती अत्याचार प्रतिबंधक कायदा कलम ३(२), ३(१) थ, (ख), (खख)-६ आणि माहिती तंत्रज्ञान अधिनियम २००० चे कलम ६६(ई), ६७, ६७(अ) अंतर्गत गुन्हा दाखल केला आहे.
परिसरात चिंता आणि पोलिस कारवाईकडे लक्ष
या घटनेमुळे परिसरात तीव्र प्रतिक्रिया उमटत असून, महाविद्यालयीन विद्यार्थ्यांमध्ये वाढत चाललेल्या सायबर गुन्हेगारीकडे लक्ष वेधले गेले आहे. पोलिसांकडून या प्रकरणात लवकरात लवकर कठोर कारवाई होण्याची अपेक्षा आहे.
