पुणे | शहराच्या कोंढवा भागात उघडकीस आलेल्या एका अत्यंत धक्कादायक आणि संतापजनक घटनेमुळे नागरिकांमध्ये प्रचंड खळबळ उडाली आहे. उच्चभ्रू सोसायटीमध्ये राहणाऱ्या २५ वर्षीय तरुणीवर डिलिव्हरी बॉयने तिच्याच घरात घुसून तोंडावर स्प्रे मारत लैंगिक अत्याचार केल्याची घटना बुधवारी सायंकाळी घडली.
पोलिसांनी दिलेल्या माहितीनुसार, आरोपीने डिलिव्हरी बॉय असल्याचे भासवत सायंकाळी साडेसातच्या सुमारास सोसायटीमध्ये प्रवेश केला. त्याने पीडित तरुणीच्या घराच्या दारावर जाऊन ‘तुमचे कुरिअर आले आहे’ असे सांगितले. मात्र, त्या तरुणीने कुरिअर आपले नसल्याचे सांगितले. तरीदेखील ‘सही करावी लागेल’ असे म्हणत त्याने तिला सेफ्टी डोअर उघडायला भाग पाडले.
डोअर उघडताच आरोपीने तिच्या चेहऱ्यावर स्प्रे फवारला आणि त्यानंतर तिच्यावर अत्याचार केला. इतक्यावरच न थांबता, आरोपीने तिच्याच मोबाईलने तिच्यासोबत सेल्फी घेतला आणि मोबाईलवर ‘परत येईल’ असा मेसेज टाईप करून ठेवला.
या प्रकरणाच्या तपासासाठी पोलिसांनी पाच पथके तातडीने रवाना केली असून, आरोपीचा शोध सुरू आहे.
