फलटण प्रतिनिधी | साहस Times :-पालखी सोहळ्याच्या स्वागतासाठी संपूर्ण फलटण शहर सज्ज होत असून, नगरपालिका प्रशासन सजगतेने कामाला लागले आहे. मुख्याधिकारी निखील मोरे यांनी प्रसिद्धीपत्रकाद्वारे ही माहिती दिली.
शहरातील रस्त्यांच्या डांबरीकरणासाठी सार्वजनिक बांधकाम विभाग तसेच भारतीय राष्ट्रीय राजमार्ग प्राधिकरणाकडे पालिकेने पाठपुरावा केला असून, या दोन्ही संस्थांनी सकारात्मक प्रतिसाद दिला आहे. नुकत्याच झालेल्या अतिवृष्टीमुळे शहरातील पुलांचे तुटलेले रेलिंग तातडीने बसवण्यात येणार आहेत.
वारकऱ्यांसाठी विशेष सुविधा म्हणून शहरातील प्रत्येक प्रमुख चौकात आठ दिवस पाणपोईची व्यवस्था केली जाणार आहे. तसेच पालिकेच्या टँकवरून पाण्याचे टँकर भरता येतील अशी सुविधा देखील उपलब्ध करून दिली जाणार आहे.
वाहतूक नियोजन अंतर्गत वारकऱ्यांचे मालवाहतूक ट्रक आणि अन्य वाहनांसाठी स्वतंत्र मार्ग आखले जात आहेत. पालखी तळावर पावसामुळे अडचण निर्माण होऊ नये यासाठी दर्जेदार डागडुजी करण्यात येणार असून, लाईटसाठी आठ सॅटेलाईट पॉईंट्स आणि विविध क्षमतेचे जनरेटरही उपलब्ध करुन दिले जातील.
तसेच पालखी तळावर तात्पुरती शौचालये आणि त्याठिकाणी प्रकाशयोजना करण्यात येणार असून, कोणत्याही प्रकारची गैरसोय वारकऱ्यांना होऊ नये यासाठी फलटण नगरपालिका सर्वतोपरी खबरदारी घेत आहे, असेही मुख्याधिकारी निखील मोरे यांनी स्पष्ट केले.
