[ad_1]
मुंबई: कुलाबा-वांद्रे-सीप्झ-आरे भुयारी मेट्रो ३ मार्गिकेतील बीकेसी ते आचार्य अत्रे चौक टप्पा २ अ चे लोकार्पण शुक्रवारी झाले. लोकार्पणानंतर शनिवारी सकाळी साडेसहा वाजता मेट्रो ३ आरे ते आचार्य अत्रे चौक अशी धावू लागली. आरे ते बीकेसी अशा आतापर्यंत धावणाऱ्या भुयारी मेट्रो मार्गिकेत आणखी पाच मेट्रो स्थानकांची भर पडली आहे.
त्यामुळे आरे ते आचार्य अत्रे चौक अशी मेट्रो मार्गिका सुरु झाल्यानंतर शनिवारी, पहिल्या दिवशी या मार्गिकेला प्रवाशांनी चांगला प्रतिसाद दिला. सुट्टीचा दिवस असतानाही पहिल्या दिवशी ३२ हजार ७९१ प्रवाशांनी मेट्रो प्रवास केला. आतापर्यंतची मेट्रो ३ मार्गिकेवरील ही सर्वाधिक दैनंदिन प्रवासी संख्या आहे. पहिल्या दिवशी प्रवास करणाऱ्यांमध्ये हौशी प्रवाशांची, नव्या मार्गिकेचा अनुभव घेण्यासाठी आलेल्या प्रवाशांची संख्या अधिक होती. भुयारी मेट्रो कशी आहे हे पाहण्यासाठी आणि सिद्धीविनायक मंदिरात जाण्यासाठी अनेकांनी मेट्रोचा प्रवास केला.
मुंबई मेट्रो रेल काॅर्पोरेशनच्या (एमएमआरसी) ३३.५ मार्गिकेतील आरे ते बीकेसी मार्गिका आॅक्टोबर २०२४ मध्ये वाहतूक सेवेत दाखल झाली. आता शनिवारी या मार्गिकेतील बीकेसी ते आचार्य अत्रे चौक अशी मार्गिका वाहतूक सेवेत दाखल झाली. एमएमआरसीच्या निर्णयानुसार शनिवारी सकाळी साडे सहावाजता आचार्य अत्रे चौक मेट्रो स्थानकावरुन आरेला जाणारी पहिली मेट्रो गाडी सुटली. तर सकाळी साडे सहा वाजता आरे मेट्रो स्थानकातून आचार्य अत्रे चौक मेट्रो स्थानकाला जाणारी पहिली मेट्रो सुटली. सकाळ ते दुपारपर्यंत मेट्रो स्थानकांवर तितकीशी गर्दी दिसून आली नाही. मात्र दुपारनंतर हळूहळू गर्दी वाढण्यास सुरुवात झाली. सायंकाळी या गर्दीत मोठी वाढ झाली.
एमएमआरसीने दिलेल्या माहिती प्रमाणे पहिल्या दिवशी, म्हणजे शनिवारी रात्री आठ वाजेपर्यंत आरे ते आचार्य अत्रे चौक मार्गिकेदरम्यान २६ हजार ७५८ प्रवाशांनी प्रवास केला. तर रात्री ९ वाजता दैनंदिन प्रवाशांची संख्या २९ हजार ७५० वर पोहचली. त्यात बीकेसी ते आचार्य अत्रे चौक दरम्यान प्रवास करणाऱ्यांची संख्या १४ हजार ४०० अशी होती. शनिवारी दिवसभरात अर्थात सकाळी साडे सहा ते रात्री साडे दहा दरम्यान मेट्रो ३ वर प्रवास करणार्या मेट्रो प्रवाशांची एकूण प्रवाशी संख्या ३२ हजार ७९१ अशी होती. त्यात बीकेसी ते आचार्य अत्रे असा प्रवास करणार्यांची संख्या १६ हजार ३७७ अशी होती.
मेट्रो ३ मार्गिकेवरील ही आतापर्यंतची सर्वाधिक दैनंदिन प्रवासी संख्या होती.कारण आतापर्यंत या मार्गिकेवरील दैनंदिन संख्या २० हजारांच्या आसपास राहिली असून शनिवार-रविवार सुट्टीच्या दिवशी यात आणखी घट होते. त्यानुसार मागील शनिवारची अर्थात ३ मे ची एकूण प्रवासी संख्या १५ हजार ९११ अशी होती. तर शनिवार, २६ एप्रिलची एकूण प्रवासी संख्या १२ हजार ७६६ अशी होती. पुढील टप्पा आणि संपूर्ण मार्गिका वाहतूक सेवेत दाखल झाल्यानंतर मेट्रो ३ चा प्रतिसाद वाढेल असे एमएमआरसीकडून सांगितले होते. त्यानुसार टप्पा २ अ सुरु झाल्यानंतर पहिल्या दिवशी प्रवासी संख्या वाढल्याचे दिसते आहे.
[ad_2]
Source link
