Mahakumbh Pintu Bhai Tax: उत्तर प्रदेशातील प्रयागराज येथे 45 दिवसांचा महाकुंभमेळा नुकताच संपन्न झाला. यात देशासह जगभरातील लाखो भाविकांनी हजेरी लावली. भाविकांच्या उपस्थितीचा वेगळा रेकॉर्ड येथे प्रस्थापित झाला होता. दरम्यान महाकुंभमध्ये वेगवेगळे व्यवसाय करुन अनेकांनी लाखोची कमाई केली. दात घासण्याच्या काड्या विकून लाखो कमावलेला एक तरुण माध्यमांसमोर आला होता. पिंटू महारा उर्फ पिंटू भाई नावाच्या व्यावसायिकाने आपण महाकुंभ काळात बोट चालवून 30 कोटी कमावल्याचेही सांगितले होते. आता या पिंटू भाईंना किती टॅक्स भरावा लागणारेय? हेदेखील जाणून घेऊया.
महाकुंभच्या 45 दिवसांत बोट चालवून 30 कोटी रुपये कमावलेले पिंटू महारा सध्या चर्चेत आहेत. उत्तर प्रदेशचे मुख्यमंत्री योगी आदित्यनाथ यांनी स्वतः विधानसभेच्या अधिवेशनात पिंटू यांच्या कमाईच्या वृत्ताला दुजोरा दिला. पिंटू महारा यांच्याकडे 130 बोटी आहेत आणि त्यांना दररोज सुमारे 23 लाख रुपये नफा मिळत होता. 45 दिवसांत त्यांनी 30 कोटी रुपये कमावणाऱ्या पिंटू महारा यांना कोट्यवधी रुपयांचा कर भरावा लागणार आहे.
30 कोटी रुपयांच्या उत्पन्नावर किती टॅक्स?
एवढ्या मोठ्या उत्पन्नावर पिंटू महारा यांना किती कर भरावा लागेल? असा प्रश्न तुम्हाला पडला असेल. भारतात 15 लाख रुपयांपेक्षा जास्त उत्पन्नावर 30% कर भरावा लागतो. आयकर गणनेनुसार पिंटू महारा यांना सुमारे 12 कोटी 80 लाख रुपये कर भरावा लागेल. एकूण उत्पन्न 30 कोटी रुपये असेल तर उत्पन्न कर 8 कोटी 98 लाख 12 हजार 500 रुपये कर भरावा लागले. यामध्ये 3 कोटी 32 लाख 30 हजार 625 रुपये अधिभार, 49 लाख 21 हजार 725 रुपये आरोग्य आणि शिक्षण उपकर असा एकूण 12 कोटी 80 लाख इतका कर असेल. जर पिंटू महारा यांनी त्यांचे खर्च कमी करून 20 कोटी रुपयांचे निव्वळ उत्पन्न दाखवले तर त्यांची कर देयता 8.52 कोटी रुपयांपर्यंत कमी होईल.
पिटू महाराने कसे कमावले 30 कोटी?
पिंटू महारा यांनी महाकुंभच्या 45 दिवसांत एकूण 130 बोटींचे संचालन केले.प्रत्येक बोटीने दररोज सरासरी 50 हजार रुपये कमावले. 300 हून अधिक खलाशांना त्यांनी रोजगार मिळवून दिला.भाविकांच्या प्रचंड गर्दीचा लाभ या व्यवसायाला झाला. महाकुंभात असा व्यवसाय करणाऱ्या प्रत्येकाने प्रचंड नफा कमावला.
महाकुंभातून केवळ खलाशांनीच नव्हे तर ऑटो, टॅक्सी, बस, बोट चालक आणि पर्यटक वाहन चालकांनीही मोठा नफा कमावला आहे. ऑटो आणि टॅक्सी चालकांनी दररोज 3 हजार ते 5 हजार रुपये कमाई केली. बस आणि पर्यटक वाहन चालकांनी दररोज 5 हजार ते 10 हजार रुपये कमाई केली. बोट चालकांनी दररोज 2 हजार ते 4 हजार रुपये इतकी कमाई केली. तर हॉटेल बुकिंग वाल्यांनी दररोज 5 हजार ते 10 हजार रुपयांपर्यंत कमाई केली.
सरकार काय म्हणते?
योगी सरकारने दिलेल्या माहितीनुसार, प्रयागराज महाकुंभ 2025 मुळे उत्तर प्रदेशच्या अर्थव्यवस्थेला 1 लाख कोटी रुपयांपेक्षा जास्त फायदा होतोय. या कार्यक्रमाचा लाखो लोकांना केवळ धार्मिकच नव्हे तर आर्थिकदृष्ट्याही फायदा झाल्याचे सरकारकडून सांगण्यात आले.
