Ramraje Nimbalkar vs Ranjitsinh Nimbalkar: सातारा जिल्ह्यातील फलटण (Phaltan) नगरपालिका निवडणुकीच्या प्रचारादरम्यान राजकीय वातावरण चांगलेच तापले असून, माजी सभापती रामराजे नाईक निंबाळकर (Ramraje Nimbalkar) आणि भाजपचे माजी खासदार रणजीत नाईक निंबाळकर (Ranjitsinh Nimbalkar) यांच्यात आरोप–प्रत्यारोप सुरु आहेत. महिलांवर अन्याय झाला तर “हा रामराजे काळा कोट घालून कोर्टात उभा राहील,” असे विधान करत रामराजे नाईक निंबाळकर यांनी विरोधकांना थेट इशारा दिला. त्यांच्या या वक्तव्याला रणजीत नाईक निंबाळकर यांनी नाव न घेता जोरदार प्रत्युत्तर दिले आहे.
फलटण नगरपालिकेच्या निवडणुकीच्या पार्श्वभूमीवर शिवसेनेच्या उमेदवार अनिकेत राजे नाईक निंबाळकर यांच्या प्रचारार्थ झालेल्या कोपरा सभेत रामराजे नाईक निंबाळकर यांनी भाजपचे माजी खासदार रणजीत नाईक निंबाळकर आणि मंत्री जयकुमार गोरे यांच्यावर टीका केली.
Ramraje Nimbalkar: तर काळा कोट घालून मी कोर्टात उभे राहील: रामराजे नाईक निंबाळकर
रामराजे म्हणाले की, डॉक्टर आत्महत्या प्रकरणाचा तपास पोलीस करतील, त्यात सत्य बाहेर येईल. मात्र या घटनेनंतर फलटणचे नाव राज्यभर बदनाम झाले आहे. “समोर बसलेल्या महिलांच्या माहेरहूनही ‘कसलं हे फलटण’ अशा फोन आले असतील. अन्याय सहन करणारा हा अन्याय करणाऱ्यापेक्षा अधिक दोषी असतो. तुमच्या मागे मी आहे, घाबरू नका. यापुढे कार्यकर्त्यांना किंवा महिला भगिनींना त्रास झाला तर हा रामराजे काळा कोट घालून तुमच्यासाठी कोर्टात उभा राहील,” असे वक्तव्य त्यांनी केले.
Ramraje Nimbalkar: भाजपच्या बदनामीचे मूळ कारण साताऱ्यात: रामराजे नाईक निंबाळकर
याच सभेत रामराजे नाईक निंबाळकर यांनी भाजपवर निशाणा साधत, “भारतीय जनता पार्टीच्या बदनामीचे मूळ कारण हे साताऱ्यात आहे,” असा आरोपही केला. त्यांनी 2019 मधील राजकीय चर्चांचा उल्लेख करत सांगितले की, देवेंद्र फडणवीस, अजित पवार, संजीवराजे, जयकुमार गोरे आणि स्वतः आपण एकत्र बसून 2024 ची निवडणूक एकत्र लढवण्याबाबत चर्चा केली होती. “तेव्हाचे मुख्यमंत्री माझ्या बाजूने होते. आता त्यांनी क्लीन चिट दिली असेल, मात्र ते इथे आल्यावर काय बोलायचं तो त्यांचा अधिकार आहे,” असेही ते म्हणाले.
Ranjitsinh Nimbalkar: डोक्यावर परिणाम झाल्यानंतर काही माणसं अशी विधानं करताय: रणजीत नाईक निंबाळकर
दरम्यान, रामराजे यांच्या या वक्तव्याला भाजपचे माजी खासदार रणजीत नाईक निंबाळकर यांनी नाव न घेता प्रत्युत्तर दिले. ते म्हणाले की, “साताऱ्यातील भारतीय जनता पार्टी आम्ही उंचीवर नेऊन ठेवली आहे. लोकसभेला याआधी सर्वाधिक मतदान भाजपलाच मिळाले आहे. डोक्यावर परिणाम झाल्यानंतर काही लोक अशा पद्धतीची वक्तव्य करत आहेत,” असे प्रत्युत्तर त्यांनी दिले.
Ranjitsinh Nimbalkar: महिलांच्या अन्यायावर बोलण्याचा अधिकार त्यांना नाही: रणजीत नाईक निंबाळकर
रणजीत नाईक निंबाळकर यांनी महिलांच्या सुरक्षेच्या मुद्द्यावरही पलटवार करत, “महिलांच्या अन्यायावर बोलण्याचा अधिकार त्यांना नाही. सर्व गुन्हेगार उमेदवार त्यांच्या बाजूने उभे आहेत. त्यांचा पाढा मला वाचायला लावू नये, हे सर्व फलटणकरांना माहित आहे,” असा टोला लगावला. तसेच महिलांच्या सुरक्षेची जबाबदारी मुख्यमंत्री आणि उपमुख्यमंत्र्यांनी घेतली असून, विविध योजनांमुळे महिलांचा सर्वाधिक पाठिंबा भाजपला मिळत असल्याचा दावा त्यांनी केला.
Ranjitsinh Nimbalkar: फलटणकर हे देवेंद्र फडणवीस यांचे चाहते: रणजीत नाईक निंबाळकर
दरम्यान, फलटण नगरपालिका निवडणुकीच्या पार्श्वभूमीवर मुख्यमंत्री देवेंद्र फडणवीस हे 18 डिसेंबर रोजी फलटणला येणार असून, भाजपचे नगराध्यक्षपदाचे उमेदवार समशेरसिंह नाईक निंबाळकर यांच्या प्रचारासाठी ते सभा घेणार आहेत. “फलटणकर हे देवेंद्र फडणवीस यांचे चाहते आहेत. त्यांनी दिलेला शब्द ते नेहमी पाळतात. यावेळी फलटणकरांना नेमका कोणता शब्द देणार, याकडे सर्वांचे लक्ष लागले आहे,” असेदेखील रणजीत नाईक निंबाळकर यांनी म्हटले. फलटणच्या निवडणूक रणधुमाळीत दोन्ही बाजूंनी केलेल्या या तीव्र वक्तव्यांमुळे राजकीय संघर्ष अधिकच तीव्र झाला असून, आगामी प्रचारात आणखी आरोप–प्रत्यारोप पाहायला मिळण्याची शक्यता आहे.
राज्य आणि देश-विदेशातील महत्त्वाच्या बातम्या; पाहा व्हिडीओ
आणखी वाचा
आणखी वाचा
