विधानसभा निवडणुकीतील दारुण पराभवानंतर महाविकास आघाडीतील वाद चव्हाट्यावर आले आहेत. आगामी स्थानिक स्वराज्य संस्थांच्या निवडणुका ठाकरे गट स्वबळावर लढणार असल्याचे जाहीर केले. त्यानंतर काँग्रेसकडूनही यावर प्रतिक्रिया देण्यात आली. त्यातच आता शरद पवारांच्या राष्ट्रवादीनेही मुंबई महापालिका निवडणुका स्वबळावर लढण्याची तयारी दर्शवली आहे. यामुळे महाविकास आघाडीत बिघाडी झाल्याचे दिसत आहे. या पार्श्वभूमीवर आज शिवसेना ठाकरे गटाचे प्रमुख उद्धव ठाकरे यांनी शरद पवारांचे मुंबईतील निवासस्थान सिल्व्हर ओकवर जाऊन शरद पवारांची भेट घेतली.
