भारतीय बौद्ध महासभा शाखा फलटण नूतन कार्यकारिणी निवड : अध्यक्षपदी भीमराव लोंढे तर सरचिटणीसपदी केशव ठोंबरे
फलटण : भारतीय बौद्ध महासभा, सातारा जिल्हा (पूर्व) यांच्या वतीने भारतीय बौद्ध महासभा शाखा फलटण तालुका कार्यकारिणीची निवड प्रक्रिया उत्साहात व यशस्वीरीत्या पार पडली.या निवडीत अध्यक्षपदी आयु. भीमराव लोंढे, सरचिटणीसपदी आयु. केशव ठोंबरे तर कोषाध्यक्षपदी आयु. राजकुमार रणवरे यांची निवड करण्यात आली.
नवीन कार्यकारिणीचे स्वागत भारतीय बौद्ध महासभा शाखा फलटण तालुक्याचे माजी अध्यक्ष आयु. महावीर भालेराव, माजी कोषाध्यक्ष आयु. विठ्ठल निकाळजे तसेच माजी प्रचार व पर्यटन उपाध्यक्ष आयु. रामचंद्र मोरे यांनी पुष्पगुच्छ देऊन केले. त्यांनी नूतन पदाधिकाऱ्यांना शुभेच्छा देत संघटनेचे कार्य अधिक गतिमान व प्रभावी करण्याचे आवाहन केले.
या प्रसंगी राज्याचे संघटक, पुणे व सातारा प्रभारी तसेच समता सैनिक दलाचे असिस्टंट स्टाफ ऑफिसर आयु. दादासाहेब भोसले यांची प्रमुख उपस्थिती लाभली. त्यांनी नूतन पदाधिकाऱ्यांचे अभिनंदन करून पुढील कार्यासाठी शुभेच्छा दिल्या. आपल्या मार्गदर्शनपर भाषणात त्यांनी बुद्ध, धम्म आणि संघ या त्रिरत्नाचा स्वीकार करून कार्य करण्याचे आवाहन केले. त्यांनी सांगितले की, संघटनेचे काम करताना समता, बंधुता व करुणा या धम्ममूल्यांचा आधार घेतल्यास समाज परिवर्तनाची चळवळ अधिक बळकट होईल. तसेच केंद्र व राज्य पातळीवरील सूचना व आदेशांचे काटेकोर पालन करत संस्थेच्या प्रोटोकॉलनुसार जबाबदाऱ्या पार पाडणे ही प्रत्येक पदाधिकाऱ्याची नैतिक जबाबदारी असल्याचे त्यांनी स्पष्ट केले. शेवटी म्हणाले की, तालुका कार्यकारणी मध्ये आजही निवडकच लोक दिसत आहेत. तरी सर्व तालुक्यातील गावांमधील व्यक्तींनाही तालुका कार्यकारणी मध्ये समाविष्ट करण्याच्या हेतूने सातारा जिल्हा पूर्व व नूतन कार्यकारिणीने जास्तीत जास्त सर्व समावेशक प्रतिनिधी घेऊन कार्यकारिणीचा समतोल साधण्याचा प्रयत्न करावा.
यावेळी सातारा जिल्हा (पूर्व) चे कार्यालयीन सचिव आयु. धनसिंग सोनवणे यांनी मार्गदर्शन करताना धम्म चळवळीला सामाजिक व शैक्षणिक परिवर्तनाशी जोडण्याचे महत्त्व अधोरेखित केले. त्यांनी समता, न्याय आणि विवेकाधिष्ठित विचार यांचा प्रसार करण्यासाठी भारतीय बौद्ध महासभेच्या माध्यमातून अधिक संघटितपणे काम करण्याचे आवाहन केले. तसेच वंचित बहुजन समाजाच्या उन्नतीसाठी सामाजिक आणि राजकीय स्तरावर सक्रिय सहभाग नोंदविण्याची गरज त्यांनी व्यक्त केली. सातारा येथील भीमाई स्मारक लवकर पूर्ण व्हावे यासाठी संघटनेने पुढाकार घ्यावा, असा प्रस्तावही त्यांनी मांडला.
यावेळी माजी अध्यक्ष आयु. शिवाजी सावंत यांनी नवीन कार्यकारिणीला शुभेच्छा देताना धम्म चळवळ अधिक गतिमान करण्यासाठी सर्व पदाधिकाऱ्यांनी एकजुटीने व निःस्वार्थ भावनेने कार्य करावे, असे सांगितले. आपापसातील मतभेद विसरून प्रत्यक्ष कामावर भर देत सर्वांना सोबत घेऊन पुढे जाणे हीच खरी संघटनशक्ती असल्याचे त्यांनी नमूद केले.
कार्यक्रमाचे अध्यक्ष आयु. नानासाहेब मोहिते यांनी आपल्या अध्यक्षीय भाषणात नवीन कार्यकारिणीला शुभेच्छा देत, “भारतीय बौद्ध महासभा ही आपली मातृसंस्था आहे, याची जाणीव ठेवून संघटनेच्या ध्येय-धोरणांनुसार कार्य करणे आवश्यक आहे,” असे सांगितले. त्यांनी माजी कार्यकारिणीच्या कार्याचेही कौतुक करत नवीन पदाधिकाऱ्यांनी त्या कार्याला अधिक गती द्यावी, अशी अपेक्षा व्यक्त केली.
यावेळी तालुका शाखेचे नूतन कोषाध्यक्ष आयु राजकुमार रणवरे म्हणाले, आपण सर्वांनी ही खूप मोठी जबाबदारी आमच्यावर सोपवलेली आहे ती जबाबदारी समर्थपणे आम्ही पार पाडण्याचा प्रयत्न करू. यामध्ये सर्वांना सोबत घेऊन काम करण्याचा आमचा मनोदय आहे. जास्तीत जास्त धम्माचा प्रचार आणि प्रसार करण्यावर आम्ही विशेष भर देऊ.
यावेळी बोलताना नूतन अध्यक्ष आयुब भीमराव लोंढे म्हणाले, भारतीय बौद्ध महासभा ही आपली मातृसंस्था आहे आणि या संस्थेच्या तालुका शाखेचे अध्यक्ष पद मला मिळाले आहे ही एक मोठी जबाबदारी आहे. त्यामुळे तालुका भर धम्माचा प्रचार आणि प्रसार करण्यासाठी अतिशय शिस्तबद्ध पद्धतीने सर्वांना सोबत घेऊन नूतन कार्यकारणीचा विश्वास आत्मसात करून चांगलं काम उभं करण्याचा प्रयत्न केला जाईल. त्यासाठी वरिष्ठांचे मार्गदर्शन व सहकार्य याची आम्ही अपेक्षा करतो. धम्म चळवळ ही कोण आहे एकट्याच्या नव्हे तर सर्वांच्या सहकार्याने पुढे जाऊ शकते. त्यामुळे आपण सर्वांनी नवीन कार्यकारणीला सहकार्य करावे. एवढीच माफक अपेक्षा मी करतो. आणि सातारा जिल्हा पूर्व च्या वतीने आमच्यावर जो विश्वास दाखवला आहे त्याबद्दल आम्ही आपले कृतज्ञ आहोत.
नवीन कार्यकारणीची उद्घोषणा भारतीय बौद्ध महासभा सातारा जिल्हा पूर्वचे संस्कार सचिव आयु. सोमीनाथ घोरपडे यांनी केली.
नवीन कार्यकारिणीत संस्कार उपाध्यक्षपदी दादासो दाजी कांबळे, प्रचार व पर्यटन उपाध्यक्षपदी अरविंद निकाळजे, समता सैनिक दल संरक्षण उपाध्यक्षपदी आयु. दीपक सपकाळ, हिशोब तपासणीसपदी संपत माने, कार्यालयीन सचिवपदी प्रदीप जगताप, संस्कार सचिवपदी सचिन मोहिते व धीरज मोरे, प्रचार व पर्यटन सचिवपदी आयु. विजय जनार्दन लोंढे व सागर गोविंद काकडे, समता सैनिक दल संरक्षण सचिवपदी आयु. सुनील कांबळे व आयु. अनिकेत कांबळे, तसेच संघटकपदी आयु. सचिन रोकडे यांची निवड करण्यात आली.
कार्यक्रमाचे सूत्रसंचालन व प्रास्ताविक राज्याचे ऑडिटर अरुण गायकवाड यांनी केले. या कार्यक्रमास ज्येष्ठ सामाजिक कार्यकर्त्या आयुनि कांताबाई काकडे, वंचित बहुजन आघाडीच्या सातारा जिल्हा महिला आघाडीच्या प्रमुख आयुनि चित्रताई गायकवाड, स्थानिक पदाधिकारी, कार्यकर्ते व धम्मबंधू-भगिनी मोठ्या संख्येने उपस्थित होते.
