सातारा : सातारा जिल्हा परिषदेत समाज कल्याण, महिला व बालकल्याण तसेच इतर विषय समित्यांच्या सभापती पदांच्या निवडीसाठी ४ एप्रिल २०२६ रोजी होणाऱ्या विशेष सभेच्या पार्श्वभूमीवर प्रशासनाने कडक उपाययोजना केल्या आहेत. मागील अध्यक्ष-उपाध्यक्ष निवडीवेळी झालेल्या गोंधळाच्या पार्श्वभूमीवर यावेळी कोणतीही अनुचित घटना घडू नये, यासाठी कडेकोट बंदोबस्त तैनात करण्यात आला आहे.
जिल्हाधिकारी संतोष पाटील यांनी भारतीय नागरिक सुरक्षा संहिता २०२३ च्या कलम १६३ अंतर्गत आदेश जारी करत जिल्हा परिषद इमारतीच्या १०० मीटर परिसरात प्रतिबंधात्मक आदेश लागू केले आहेत. हे निर्बंध ४ एप्रिल रोजी सकाळी ७ वाजल्यापासून सभा संपेपर्यंत लागू राहणार आहेत.
मागील निवडणुकीत कार्यकर्त्यांची मोठी गर्दी, घोषणाबाजी आणि ढकलाढकलीमुळे तणावपूर्ण परिस्थिती निर्माण झाली होती. या घटनेचे पडसाद विधानसभेत आणि विधान परिषदेतही उमटले होते. यावरून सत्ताधारी आणि विरोधकांमध्ये आरोप-प्रत्यारोपांची मालिका रंगली होती.
नवीन आदेशानुसार, केवळ नवनिर्वाचित सदस्य, शासकीय अधिकारी-कर्मचारी आणि बंदोबस्तावरील पोलीस अधिकारी यांनाच जिल्हा परिषद परिसरात प्रवेश दिला जाणार आहे. इतर सर्वांसाठी प्रवेशबंदी लागू करण्यात आली असून नियमांचे उल्लंघन करणाऱ्यांवर कठोर कारवाईचा इशारा देण्यात आला आहे.
दरम्यान, निवडणूक प्रक्रिया शांततेत व पारदर्शकतेने पार पडावी यासाठी पोलीस यंत्रणा पूर्ण क्षमतेने तैनात करण्यात आली आहे. प्रशासनाच्या या निर्णयामुळे संभाव्य तणाव टाळण्यास मदत होईल, अशी अपेक्षा व्यक्त केली जात आहे.
