सोलापूर : एसटी बसमधून प्रवास करणाऱ्या एका महिलेचे दहा तोळे सोन्याचे दागिने चोरट्यांनी लंपास केल्याची घटना बार्शी येथील एसटी बस स्थानकावर उजेडात आली.
या संदर्भात मनीषा सूर्यकांत गाजरे (वय ४०, रा. नेरुळ, नवी मुंबई) यांनी बार्शी शहर पोलीस ठाण्यात दिलेल्या फिर्यादीनुसार, बार्शी एसटी बस स्थानकावर सोन्याच्या दागिन्यांच्या चोरीचा प्रकार सकाळी उजेडात आला. मनीषा गाजरे यांचे मूळ गाव धाराशिव जिल्ह्यातील बेंबळी येथील आहे. गावात काही दिवस मुक्काम करून त्या सकाळी धाराशिव-ठाणे एसटी बसमध्ये बसून नेरूळकडे परत निघाल्या होत्या.
धाराशिवनंतर बार्शीमध्ये एसटी बस आली असता मनीषा गाजरे यांना आपल्या जवळील दहा तोळे सोन्याचे दागिने असलेली पिशवी गायब झाल्याचे लक्षात आले. गायब झालेल्या पिशवीमध्ये पाच तोळे सोन्याच्या बिलवरी बांगड्या आणि पाच तोळे पाटल्या होत्या.
एसटी बसमधील गर्दीत अज्ञात चोरट्यांनी लक्ष विचलित करून गाजरे यांची सोन्याचे दागिने असलेली पिशवी अलगदपणे चोरून नेल्याचे दिसून आले. या गुन्ह्याचा तपास बार्शी शहर पोलीस करीत आहेत.
