फलटण प्रतिनिधी : फलटण तालुक्यातील तथाकथित अघोरी बाबा प्रकरणावरून राजकीय वातावरण तापले असून माजी खासदार रणजितसिंह नाईक निंबाळकर यांनी केलेल्या आरोपांना निंबाळकर कुटुंबीयांनी जोरदार प्रत्युत्तर दिले आहे. “अघोरी विद्या, साधू-मांत्रिक यावर आमच्या कुटुंबाचा काडीभरही विश्वास नाही. आमचे घराणे वारकरी संप्रदायाचे आहे,” असे स्पष्ट करत श्रीमंत संजीवराजे नाईक निंबाळकर यांनी हे आरोप फेटाळले.
श्रीमंत संजीवराजे म्हणाले की, रामराजेंचे नाव घेणे हा निव्वळ राजकीय स्टंट असून विरोधकांकडून जाणीवपूर्वक बदनामीचा प्रयत्न केला जात आहे. साधू-मांत्रिकाचा विषय पुढे करून राजकीय लाभ मिळवण्याचा हा डाव असल्याचा आरोपही त्यांनी केला.
दरम्यान, श्रीमंत अनिकेतराजे नाईक निंबाळकर यांनीही या प्रकरणावर आपली भूमिका मांडत सांगितले की, अंधश्रद्धा निर्मूलन कायद्यान्वये संबंधित तांत्रिकाची चौकशी व्हावी, यासाठी पोलिसांकडे तक्रार दाखल केली जाणार आहे. जर फलटणमध्ये असे प्रकार घडत असतील तर त्या मांत्रिकाला पोलिसांच्या ताब्यात का देण्यात आले नाही, असा सवालही त्यांनी उपस्थित केला.
तसेच, मांत्रिकाला सोडवण्यासाठी प्रत्यक्ष घटनास्थळी माजी खासदार रणजितसिंह नाईक निंबाळकर पोहोचणे हेच आश्चर्यकारक आहे, असे म्हणत अनिकेतराजे यांनी विरोधकांच्या भूमिकेवर प्रश्नचिन्ह उपस्थित केले.
“माजी खासदारांचा हा रडीचा डाव असून राजकीय अस्तित्व टिकवण्यासाठी केलेला शेवटचा प्रयत्न आहे,” अशी टीकाही अनिकेतराजे नाईक निंबाळकर यांनी केली. अघोरी कृत्यांशी आमचा काडीमात्रही संबंध नसल्याचे ठामपणे सांगत त्यांनी सर्व आरोप खोटे आणि दिशाभूल करणारे असल्याचे स्पष्ट केले.
या प्रकरणामुळे फलटणच्या राजकारणात नव्या वादाला तोंड फुटले असून पुढील घडामोडींवर सर्वांचे लक्ष लागले आहे.
