सोलापूर : राज्यात विशेषतः मुंबईत करोनाबाधित रुग्ण पुन्हा वाढत असतानाच सोलापुरातही एक संशयित करोनाबाधित रुग्ण आढळून आला आहे. या रुग्णावर एका खासगी रुग्णालयात वैद्यकीय उपचार सुरू आहेत. या माहितीला डॉ. वैशंपायन स्मृती शासकीय वैद्यकीय महाविद्यालयाचे अधिष्ठाता डॉ. संजीव ठाकूर यांनी दुजोरा दिला आहे.
मुंबईत करोना साथीचा उपसर्ग पुन्हा सुरू झाल्यामुळे तेथील आरोग्य यंत्रणा सजग झाली आहे. त्याचबरोबर इकडे सोलापुरातही संशयित करोनाबाधित रुग्ण आढळून आल्यामुळे स्थानिक आरोग्य आणि वैद्यकीय यंत्रणा सतर्क झाली आहे. संबंधित संशयित रुग्णावर एका खासगी रुग्णालयात वैद्यकीय उपचार सुरू आहेत. त्याची प्रकृती स्थिर असल्याचे वैद्यकीय सूत्रांनी सांगितले.
This quiz is AI-generated and for edutainment purposes only.
दरम्यान, ही माहिती देताना डॉ. वैशंपायन स्मृती शासकीय वैद्यकीय महाविद्यालयाचे अधिष्ठाता डॉ. संजीव ठाकूर यांनी यंत्रणेची विशेष बैठक घेतली. वैद्यकीय महाविद्यालय संलग्न असलेल्या छत्रपती शिवाजी महाराज सर्वोपचार शासकीय रुग्णालयात अलगीकरण कक्ष उभारण्यात येत आहे. औषधांचा तुटवडा पडू नये म्हणून दक्षता घेतली जात असून, तशा सूचना संबंधित विभागांना देण्यात आल्या आहेत. रुग्णसेवेत कोणतीही उणीव राहू नये म्हणून आपत्कालीन परिस्थितीविषयी खास तालीमही घेण्यात आली आहे, असे डॉ. ठाकूर यांनी सांगितले. यापूर्वी करोना महामारीच्यावेळी रुग्णालयातील नियमित वैद्यकीय सेवेवर परिणाम झाला होता. त्याची पुनरावृत्ती होणार नाही, यासाठी नियोजन आखले जात असल्याची माहितीही त्यांनी दिली.
