बोधगया | प्रतिनिधी –बोधगया येथे सुरू असलेल्या महाबोधी महाविहार मुक्ती आंदोलनात आता एक नवा ऐतिहासिक टप्पा गाठला गेला आहे. वंचित बहुजन आघाडीचे राष्ट्रीय अध्यक्ष अ‍ॅड. प्रकाश आंबेडकर यांनी आंदोलनात प्रत्यक्ष सहभाग घेत स्वतः दिलेले वचन पाळले आहे.
१२ फेब्रुवारी २०२५ पासून सुरू असलेले हे आंदोलन महाबोधी महाविहाराचे सर्वस्वी नियंत्रण बौद्ध समाजाकडे सोपवावे, तसेच बोधगया मंदिर कायदा १९४९ रद्द करण्यात यावा, या दोन मुख्य मागण्यांसाठी सुरू आहे. बौद्ध भिक्षूंच्या नेतृत्वाखालील हे बेमुदत उपोषण सध्या देशभरात चर्चेचा विषय बनले आहे.
अ‍ॅड. प्रकाश आंबेडकर यांच्या उपस्थितीमुळे आंदोलनाला नवसंजीवनी मिळाली आहे. याआधी त्यांनी आंदोलनात सहभागी होण्याचे वचन दिले होते, जे त्यांनी आज पाळले. आंदोलनस्थळी त्यांचे आगमन होताच उपोषणकर्त्यांमध्ये उत्साहाची लाट उसळली.
या आंदोलनाला देशभरातूनच नव्हे तर आंतरराष्ट्रीय स्तरावरूनही मोठा पाठिंबा मिळत आहे. वंचित बहुजन आघाडी आणि भारतीय बौद्ध महासभा यांच्या वतीने देशभरात स्वाक्षरी मोहिमा सुरू आहेत. हजारो नागरिकांनी या मोहिमांमध्ये सहभाग घेत आंदोलनाला समर्थन दिले आहे.
बोधगया हे बुद्धांच्या ज्ञानप्राप्तीचे पवित्र स्थळ असून देखील, महाबोधी महाविहाराचे नियंत्रण बौद्ध नसलेल्या व्यक्तींच्या हातात असल्याचा आरोप आंदोलनकर्ते करीत आहेत. त्यामुळे, “धम्म भूमीवर बौद्धांचेच अधिपत्य हवे,” असा जोरदार आवाज आता देशभरातून उठू लागला आहे.
मुख्य मुद्दे:
अ‍ॅड. प्रकाश आंबेडकर यांचा आंदोलनस्थळी थेट सहभाग
बोधगया मंदिर कायदा १९४९ रद्द करण्याची मागणी
आंदोलनाला देश-विदेशातून मोठा पाठिंबा
वंचित बहुजन आघाडी आणि भारतीय बौद्ध महासभा यांच्या स्वाक्षरी मोहिमा
