Indian Army Shares Video: ८ मे रोजी मध्यरात्री पाकिस्तानकडून भारतीय हद्दीत जवळपास ५० ड्रोन डागण्यात आल्याचं समोर आलं आहे. भारताच्या S-400 सुदर्शन या एअर डिफेन्स सिस्टीमच्या मदतीने भारतानं पाकिस्तानचे हे सर्व ड्रोन हल्ले निष्प्रभ केले असून भारतीय हद्दीत कोणत्याही प्रकारची जीवितहानी झाली नसल्याचं स्पष्ट करण्यात आलं आहे. एकीकडे पाकिस्तानच्या बाजूने या ड्रोन हल्ले झाल्याचं प्रत्यक्ष स्थानिकांनीही पाहिल्यानंतरही पाकिस्तानने मात्र आपण काहीही केलं नसल्याचा कांगावा केला. यानंतर मात्र भारतीय लष्करानं थेट पुरावाच दिला असून पाकिस्तानच्या ड्रोन हल्ल्यांचा व्हिडीओ शेअर केला आहे.
काय घडलं ८ मेच्या मध्यरात्री?
गुरुवारी ८ मेच्या मध्यरात्री पाकिस्तानकडून मोठ्या प्रमाणावर भारतातली १५ शहरांवर ड्रोन हल्ले करण्याचा प्रयत्न करण्यात आला. जम्मू काश्मीर, पंजाब, राजस्थान, गुजरात या राज्यांमधील सीमेवरच्या भागांमधली ही ठिकाणं असून त्याला भारतानं चोख प्रत्युत्तर दिलं आहे. एस ४०० सुदर्शन या भारताच्या अत्याधुनिक एअर डिफेन्स सिस्टीमच्या मदतीने पाकिस्तानचे सर्व ड्रोन भारतानं पाडले आहेत. या कारवाईदरम्यान सुरक्षेचा उपाय म्हणून सीमेवरच्या जिल्ह्यांमध्ये पूर्ण ब्लॅकआऊट पाळण्यात आला.
पाकिस्तानच्या या आगळिकीनंतर भारतानं पाकिस्तानला स्पष्ट शब्दांत ठणकावलं आहे. पाकिस्ताननं जर ही आगळीक थांबवली नाही, तर भारतही थांबणार नाही, अगदी शेवटपर्यंत प्रत्युत्तर दिलं जाईल, असा सज्जड दमच भारतानं पाकिस्तानला दिल्याचं इंडियन एक्स्प्रेसच्या वृत्तात नमूद करण्यात आलं आहे. या पार्श्वभूमीवर आंतरराष्ट्रीय स्तरावरून अनेक देशांनी भारताच्या समर्थनार्थ भूमिका घेतली असून पाकिस्तानला माघार घेण्याचा सल्ला दिला आहे.
भारतानं दिला पुरावा, पाकिस्तानचा दावा खोटा!
दरम्यान, पाकिस्तानं भारतातील ड्रोन हल्ल्यांशी आपला काहीही संबंध नसल्याचा कांगावा पाकिस्ताननं केल्यानंतर भारतीय लष्करानं पुरावाच सादर केला आहे. भारतीय लष्कराच्या अधिकृत एक्स हँडलवर यासंदर्भातली माहिती देण्यात आली असून ड्रोन हल्ल्याचा एक व्हिडीओदेखील शेअर केला आहे.
“ऑपरेशन सिंदूर… पाकिस्तानी लष्करानं ८ आणि ९ मेदरम्यानच्या रात्री भारताच्या संपूर्ण पश्चिमेकडील सीमेलगत वेगवेगळ्या ठिकाणी ड्रोन आणि इतर दारुगोळ्याचा वापर करून हल्ला केला. जम्मू काश्मीरमधील नियंत्रण रेषेजवळ (LOC) पाकिस्तानी लष्करानं अनेक ठिकाणी शस्त्रसंधीचं उल्लंघन केलं आहे. पाकिस्तानच्या या ड्रोन हल्ल्यांना भारताकडून यशस्वीरीत्या निष्प्रभ करण्यात आलं असून शस्त्रसंधी उल्लंघनालाही सडेतोड उत्तर देण्यात आलं आहे”, असं भारतीय लष्करानं या पोस्टमध्ये म्हटलं आहे.
“भारताचं सार्वभौमत्व आणि भौगौलिक एकतेचं संरक्षण करण्यासाठी भारतीय लष्कर बांधील आहे. त्यावर आक्रमण करणाऱ्या कोणत्याही आततायी कृतीला संपूर्ण ताकदीनिशी उत्तर दिलं जाईल”, असा इशाराही भारतीय लष्करानं पाकिस्तानला दिला आहे.
Video मध्ये काय आहे?
लष्करानं शेअर केलेल्या व्हिडीओ क्लिपमध्ये एक ड्रोन हवेतच उद्ध्वस्त झाल्याचं दिसत आहे. लष्कराच्या विशेष कॅमेऱ्यात टिपलेली ही दृश्य पाकिस्तानच्या कांगाव्यातला फोलपणा स्पष्ट करण्यासाठी पुरेशी ठरली असून आता पाकिस्तानवर आंतरराष्ट्रीय स्तरावरूनदेखील शांततेसाठी माघार घेण्यासाठी दबाव येऊ लागला आहे.
