गुरुग्राम पोलिसांनी मॉडेल दिव्या पाहुजा हिच्या हत्येसाठी वापरलेली बीएमडब्ल्यू कार पंजाबच्या पटियाला येथून जप्त केली आहे. पटियालाच्या बसस्थानकाजवळ ही कार टाकून दिली होती.
सायबर सिटी गुरुग्राममधील एका हॉटेलमध्ये २७ वर्षीय मॉडेल दिव्या पाहुजाची गोळ्या झाडून हत्या (Divya Pahuja Murder Case) करण्यात आल्याची घटना समोर आली आहे. या हत्याकांडाचा तपास सुरू असून या प्रकरणी मोठी अपडेट समोर आली आहे. दिव्याच्या हत्येचा आरोप असलेल्या हॅाटेल मालक अभिजीत सिंगसह तीन आरोपींना गुरुग्राम पोलिसांनी अटक केली आहे. हेमराज आणि ओमप्रकाश अशी आरोपींची नावं असुन हे दोघंही अभिजीतच्या हॅाटेलमध्ये काम करत होते. या सोबत तिन्ही आरोपींनी ज्या कारमधुन दिव्याच्या मृतदेह नेला ती कारही पोलिसांनी जप्त केली आहे. मात्र, पोलिसांना अद्याप तिचा मृतदेह नाही सापडला.
हे सुद्धा वाचा
नेमकं प्रकरण काय
बुधवारी गुरुग्राम पोलिसांना माहिती मिळाली होती की, सेक्टर-14 मधील हॉटेल सिटी पॉइंट येथे एका महिलेचा खून झाला आहे. पोलिसांनी माहितीच्या आधारे तपास सुरू केला असता बलदेव नगरमध्ये राहणाऱ्या मॅाडेल दिव्याचा हॉटेलमध्ये खून करून मृतदेह बाहेर कुठेतरी विल्हेवाटीसाठी नेल्याचे तपासात उघड झाले. मृताच्या बहिणीच्या तक्रारीवरून पोलिसांनी खुनासह अन्य कलमांतर्गत गुन्हा दाखल केला.
