फलटण :- फलटण नगरपरिषदेच्या निवडणुकीच्या पार्श्वभूमीवर शहराच्या राजकारणात मोठा बदल घडला आहे. फलटण नगरपरिषदेचे माजी नगराध्यक्ष सोमाशेठ जाधव आणि माजी नगरसेवक विक्रम जाधव यांनी आज राष्ट्रवादी काँग्रेस पार्टीच्या (अजित पवार गट) उपस्थितीत पक्षप्रवेश केला.
हा पक्षप्रवेश सोहळा प्रभाग क्रमांक १ मधील सोमवार पेठेत सोमशेठ जाधव यांच्या निवासस्थानी पार पडला. या वेळी फलटण-कोरेगाव विधानसभा मतदारसंघाचे आमदार सचिन पाटील तसेच सातारा जिल्हा मध्यवर्ती बँकेचे संचालक आणि राष्ट्रवादीचे फलटण तालुकाध्यक्ष श्रीमंत शिवरूपराजे खर्डेकर-निंबाळकर प्रमुख उपस्थित होते.
उपमुख्यमंत्री अजित पवार यांच्या नेतृत्वावर विश्वास ठेवून जाधव यांनी राष्ट्रवादीत प्रवेश केला असल्याचे जाहीर करण्यात आले.
यावेळी आमदार सचिन पाटील म्हणाले,
“फलटण शहराचा सर्वांगीण विकास करण्यासाठी सर्वांना सोबत घेऊन काम करणार आहोत. विधानसभा निवडणुकीपासूनच ‘बदला घ्यायचा नाही, तर बदल करायचा आहे’ हे आमचे धोरण आहे आणि त्याच दिशेने आम्ही कटिबद्ध आहोत.”
राष्ट्रवादीचे तालुकाध्यक्ष श्रीमंत शिवरूपराजे खर्डेकर-निंबाळकर यांनीही या प्रवेशाचे स्वागत करताना म्हटले,
“उपमुख्यमंत्री अजित पवार यांच्या नेतृत्वाखाली फलटण तालुक्याचा विकास अधिक गतीने होईल. माजी नगराध्यक्ष सोमशेठ जाधव यांच्यासारखे अनुभवी नेतृत्व पक्षात आल्याने राष्ट्रवादीची ताकद निश्चितच वाढेल.”
या प्रवेशामुळे फलटण शहरातील राष्ट्रवादी काँग्रेसची ताकद लक्षणीय वाढली असून, विशेषतः प्रभाग क्रमांक १ आणि आसपासच्या परिसरातील राजकीय समीकरणे आता वेगाने बदलण्याची शक्यता निर्माण झाली आहे.
या कार्यक्रमाला राष्ट्रवादी काँग्रेसचे अनेक पदाधिकारी, कार्यकर्ते आणि जाधव यांचे समर्थक मोठ्या संख्येने उपस्थित होते.
