फलटण प्रतिनिधी (उमेश काकडे ): आंतरराष्ट्रीय व आखाती देशांमधील युद्धजन्य परिस्थितीमुळे इंधन तुटवड्याच्या अफवा पसरत असल्या तरी सातारा जिल्ह्यात पेट्रोल आणि डिझेलचा पुरेसा साठा उपलब्ध असल्याची माहिती जिल्हा प्रशासनाने दिली आहे. नागरिकांनी कोणत्याही अफवांवर विश्वास न ठेवता शांत राहण्याचे आवाहन करण्यात आले आहे.
IOCL, BPCL आणि HPCL या तेल कंपन्यांच्या अधिकाऱ्यांनी जिल्ह्यात इंधनाची कमतरता नसल्याचे स्पष्ट केले आहे. काही पेट्रोल पंपांवर “Advance Payment System” मुळे पुरवठ्यात तात्पुरता अडथळा निर्माण झाल्याचे सांगण्यात आले आहे.
युद्धजन्य परिस्थितीचा गैरफायदा घेत इंधनाची साठेबाजी करणे किंवा जास्त दराने विक्री करणे हा जीवनावश्यक वस्तू कायदा १९५५ अंतर्गत गंभीर गुन्हा असून अशा प्रकारांवर कठोर कारवाई केली जाईल, असा इशारा प्रशासनाने दिला आहे.
तसेच, सुरक्षेच्या दृष्टीने प्लास्टिक बाटल्या, कॅन, ड्रम किंवा इतर अप्रमाणित कंटेनरमध्ये इंधन विक्रीस पूर्णतः बंदी घालण्यात आली आहे. नियमांचे उल्लंघन करणाऱ्या पंपचालकांवर आणि संबंधित ग्राहकांवर कठोर कारवाई होणार असून संबंधित पंपांचा परवाना कायमस्वरूपी रद्द करण्याची शिफारस करण्यात येणार आहे.
जिल्हा पुरवठा अधिकारी वैशाली राजमाने यांनी नागरिकांना आवाहन केले आहे की, राष्ट्रीय सुरक्षेच्या दृष्टीने प्रशासनास सहकार्य करावे आणि बेकायदेशीर साठेबाजी किंवा काळाबाजाराच्या घटना आढळल्यास तात्काळ जिल्हा पुरवठा कार्यालयाशी संपर्क साधावा.
