बारामती : बारामती येथील पुण्यश्लोक अहिल्यादेवी होळकर शासकीय वैद्यकीय महाविद्यालय व सर्वोपचार रुग्णालयात, उपमुख्यमंत्री व जिल्ह्याचे पालकमंत्री अजित पवार यांच्या ६७ व्या वाढदिवसानिमित्त मोफत गुडघा प्रत्यारोपण शिबिराचे आयोजन करण्यात आले आहे. हे शिबिर ४ जून व ७, ८ आणि १६ जुलै २०२५ रोजी होणार आहे.
या शिबिरात वॉक फाऊंडेशन (पुणे) आणि बायोरॅड मेडिसिस या स्वयंसेवी संस्थांच्या सहकार्याने पूर्णपणे मोफत तपासणी व शस्त्रक्रिया करण्यात येणार आहे. आर्थिक अडचणीमुळे उपचार घेऊ न शकणाऱ्या ज्येष्ठ नागरिकांना ही मोठी संधी उपलब्ध होणार आहे.
मुंबई, पुणे व कोल्हापूर येथील नामांकित व गुडघा प्रत्यारोपणातील तज्ज्ञ डॉक्टरांच्या माध्यमातून शस्त्रक्रिया करण्यात येणार असून, आंतरराष्ट्रीय दर्जाचे सांधे व रोबोटिक तंत्रज्ञानाचा वापर यामध्ये होणार आहे, ज्यामुळे शस्त्रक्रिया अचूकतेने व यशस्वीपणे होईल.
शिबिरात विशेषतः संधिवात, तीव्र वेदना, चालण्यास अपार अडचण असलेले व आर्थिक दुर्बल पार्श्वभूमीतील रुग्णांनी सहभाग नोंदवावा. इच्छुकांनी लवकरात लवकर पुण्यश्लोक अहिल्यादेवी होळकर शासकीय वैद्यकीय महाविद्यालय व रुग्णालयात नोंदणी करून या सुवर्णसंधीचा लाभ घ्यावा. आपल्या नातेवाईकांना व परिचितांना याबाबत माहिती देण्याचे आवाहनही रुग्णालय प्रशासनाने केले आहे.
