फलटण : फलटण उपविभागीय पोलीस अधिकारी (SDPO) राहुल रावसाहेब धस यांच्या शिरपेचात आणखी एक मानाचा तुरा रोवला गेला आहे. महाराष्ट्र राज्य पोलीस दलातील उत्कृष्ट सेवेसाठी त्यांना पोलीस महासंचालक रश्मी शुक्ला यांच्या हस्ते “पोलीस महासंचालक पदक” जाहीर करण्यात आले आहे. सोमवारी (२८ एप्रिल) अधिकृत यादी प्रसिद्ध झाली.
याबाबत अधिक माहिती अशी की, पोलीस महासंचालक कार्यालय, मुंबई यांच्या वतीने राज्यातील ८०० पोलिसांना हे गौरवपदक जाहीर करण्यात आले आहे. सातारा जिल्ह्यातून फलटण उपविभागाचे राहुल रावसाहेब धस यांच्यासह बाळासाहेब यशवंत भालचीम, संभाजी कल्याणराव काटकर, सुजीत पांडुरंग भोसले, अजित नामदेव कर्णे, रुपाली संतोष वाघ, अंकुश रामराव यादव, आणि शशिकांत गंगाराम काळे यांचाही समावेश आहे.
विशेष म्हणजे, याआधी २०२४ मध्ये राहुल धस यांना केंद्र सरकारकडून “केंद्रीय गृहमंत्री दक्षता पदक” बहाल करण्यात आले होते. भारताचे पहिले गृहमंत्री सरदार वल्लभभाई पटेल यांच्या स्मृतिप्रित्यर्थ दिले जाणारे हे पदक, पोलिस दलातील उत्कृष्ट तपास कार्याबद्दल दिले जाते.
पोलीस महासंचालक पदक जाहीर होताच जिल्हा पोलीस अधीक्षक समीर शेख, अपर पोलीस अधीक्षक वैशाली कडुकर तसेच फलटण उपविभागातील सर्व अधिकारी व पोलिसांनी राहुल धस यांचे विशेष अभिनंदन केले.
