पुणे – स्वारगेट बस स्थानकातील ‘शिवशाही’ बसमध्ये बलात्कार करणाऱ्या आरोपी दत्तात्रय गाडेला अखेर पुणे पोलिसांनी अटक केली आहे. तब्बल 75 तासांच्या शोधमोहीमेनंतर आरोपीला पुणे पोलिसांनी शिरूर तालुक्यातील गुनाट गावच्या शिवारातून ताब्यात घेतले. स्थानिक गावकऱ्यांच्या मदतीने आणि स्वारगेट पोलीस पथकाच्या प्रयत्नांमुळे आरोपीला रात्री एकच्या सुमारास अटक करण्यात आली.
गुन्हा करून मूळ गावी परतला
मंगळवारी पहाटे 5.30 वाजता पुण्यात हा धक्कादायक प्रकार घडला होता. अत्याचार केल्यानंतर आरोपी गुनाट गावात परतला आणि संध्याकाळी पाचपर्यंत घरीच थांबला. पोलिसांना सुरुवातीपासूनच संशय होता की तो शिरूरमध्येच लपला असावा आणि त्यांचा हा अंदाज अखेर खरा ठरला.
सराईत गुन्हेगार आणि धक्कादायक खुलासे
दत्तात्रय गाडे याचा गुन्हेगारी इतिहास उघडकीस आला असून, त्याच्यावर शिरूर, शिक्रापूर आणि अहिल्यानगर येथे गुन्हे दाखल आहेत. याआधीही तो महिलांना लिफ्ट देण्याच्या बहाण्याने लुबाडत असल्याची माहिती पोलिसांना मिळाली आहे. विशेष म्हणजे, तो एसटी स्थानकांवर फिरत महिलांना आपण पोलीस असल्याचे भासवून फसवण्याचा प्रयत्न करत होता.
घरच्यांची चौकशी सुरू
गाडेच्या कुटुंबाचीही चौकशी सुरू असून, पुणे पोलिसांनी त्याच्या आई, पत्नी आणि भावाचा जबाब नोंदवला आहे. दरम्यान, आरोपीला आज दुपारी 3 वाजता न्यायालयासमोर हजर केले जाणार आहे.
👉 पोलिसांनी आरोपीला अटक करून मोठे यश मिळवले असले तरी, महिलांच्या सुरक्षिततेच्या दृष्टीने प्रशासनाने अधिक कडक पावले उचलण्याची गरज आहे.
