फलटण: संजीवराजे नाईक निंबाळकर आणि रघुनाथराजे नाईक निंबाळकर यांच्या निवासस्थानी सुरू असलेल्या आयकर विभागाच्या चौकशीचा आज सलग चौथा दिवस आहे. पहाटे ६ वाजल्यापासून आयकर अधिकाऱ्यांनी तपासणीला सुरुवात केली. या प्रकरणामुळे राज्याच्या राजकारणात मोठी खळबळ उडाली आहे.
आर्थिक व्यवहारांवर कसून चौकशी
गोविंद मिल्क अँड मिल्क प्रॉडक्ट, कुरोली फूड्स, श्रीमंत मालोजीराजे सहकारी बँक, श्रीराम सहकारी साखर कारखाना यासह विविध उद्योगांच्या आर्थिक देवाण-घेवाणीची चौकशी आयकर विभाग करत आहे. आज सकाळी संजीवराजे नाईक निंबाळकर आणि आयकर अधिकाऱ्यांनी श्रीमंत मालोजीराजे सहकारी बँकेला भेट देऊन आर्थिक व्यवहारांची पाहणी केली.
सरोज व्हीला बाहेर कार्यकर्त्यांची मोठी गर्दी
संजीवराजे यांच्या फलटण येथील निवासस्थानी, सरोज व्हीला बाहेर कार्यकर्त्यांनी मोठ्या संख्येने गर्दी केली होती. गावोगावीचे अनेक पदाधिकारी आणि समर्थक पहाटेपासूनच ठाण मांडून होते. सलग चौथ्या दिवशीही कार्यकर्त्यांमध्ये तणाव जाणवत नसला, तरी मानसिक थकव्याचे वातावरण स्पष्ट दिसत होते.
“सगळं व्यवस्थित आहे” – शिवांजलीराजे नाईक निंबाळकर
संजीवराजे यांच्या पत्नी सौ. शिवांजलीराजे नाईक निंबाळकर यांनी कार्यकर्त्यांना धीर देत, “सगळं व्यवस्थित आहे, काळजीचे कारण नाही,” असे सांगितले. त्यांनी स्मितहास्य करत दिलासा दिल्याने उपस्थित कार्यकर्त्यांमध्ये थोडा आत्मविश्वास निर्माण झाला.
“तुम्ही सगळे आहात, त्यामुळे आधार वाटतो” – सत्यजितराजे
चौकशीच्या चौथ्या दिवशी संजीवराजे नाईक निंबाळकर यांचे पुत्र सत्यजितराजे नाईक निंबाळकर आपल्या आईंसोबत कार्यकर्त्यांना भेटण्यासाठी आले. त्यांनी उपस्थितांचे आभार मानत सांगितले, “प्रवासातून येताना थोडं टेन्शन आलं होतं, पण तुम्ही सगळे आहात, त्यामुळे आधार वाटतो. आता केवळ कागदपत्र पूर्ण करण्याचे काम बाकी असून ते लवकरच संपेल. तुम्ही तुमच्या कामाला लागलात तरी चालेल.”
आयकर चौकशी अजून किती दिवस?
राष्ट्रवादी काँग्रेसचे ज्येष्ठ नेते रामराजे नाईक निंबाळकर यांचे चुलत बंधू संजीवराजे आणि रघुनाथराजे यांच्या विरोधात सुरू असलेल्या आयकर चौकशीचे ८० तास पूर्ण झाले आहेत. इतक्या मोठ्या कालावधीपर्यंत चौकशी सुरू असल्याने राजकीय आणि सामाजिक वर्तुळात चर्चांना उधाण आले आहे. चौकशी अद्याप सुरूच असल्याने कार्यकर्त्यांना ही प्रक्रिया आज पूर्ण होण्याची आशा आहे.
