Dada Kondke: नाव कृष्णा असूनही ‘दादा’ का बनले? दादा कोंडकेंच्या आयुष्यातील ‘हा’ किस्सा ऐकलात का?

दादा कोंडके यांचा जन्म मुंबईतल्या नायगावात कृष्णाष्टमीच्या दिवशीच झाला. सहाजिकच आईवडीलांनी बाळाचे नाव कृष्णा ठेवले. पण, या नावाने त्यांना ना आई वडीलांनी कधी हाक मारली, ना त्यांच्या चाहत्यांनी… दादांचा जन्म झाला तेव्हापासून त्यांची शरीरयष्टी फारच किरकोळ होती. दिवस उजाडला की, काही ना काही कारणाने हा चिमुकला कृष्णा आजारी पडायचा. दादांच्या भावाचे आरोग्यही फार काही चांगले नव्हते. यामुळे कृष्णाची आई प्रचंड काळजीत पडली होती. गिरणी कामगार असलेल्या कृष्णाच्या वडीलांनाही काही सुचेना. मग, कुणीतरी त्यांना सांगितले की मुलाला नावाने हाक मारू नका, त्याला तात्या, सोन्या, दादा, आण्णा असं काहीतरी नाव द्या.