नेटस्ट्रीम: निमोना, डिलिट अन् सार्जंट!

नेटफ्लिक्सवर प्रदर्शित झालेला ‘निमोना’ हा एक अॅनिमेटेड साय-फाय कॉमेडी चित्रपट आहे, ज्याची कथा ग्लोरेथ नावाच्या डिस्टोपियन जगामध्ये सेट केली गेलीय. हा सिनेमा २०१५ च्या ‘निमोना क्रॉनिकल्स’ या ग्राफिक कादंबरीवर बेतलेला आहे. कादंबरीत डिस्टोपियन जगातही जातीवाद आणि वर्णद्वेष कसा अस्तित्वात आहे, यावरचे भाष्य आहे. सुदैवाने हे विश्व लैंगिकतेपासून मुक्त असते आणि सर्व प्रकारच्या नात्यांना मान्यता देते. उडत्या कार, मनोरंजक होर्डिंग तसेच जागतिक दर्जाच्या सुरक्षा प्रणालींसह डिजिटल तंत्रज्ञानाचे जग ‘निमोना’ नेमकेपणाने दाखवतो.

ग्लोरेथ हे एका महान सम्राज्ञीचे नाव असते, जिने एका विशालकाय क्रूर राक्षसाविरूद्धची लढाई जिंकून स्वतःचे राज्य निर्माण केलेले असते. ग्लोरेथ हे संपूर्ण तटबंदी असलेले नगर. त्यावर राज्य करणाऱ्या प्रत्येक वारसाने त्याचे रक्षण केले आहे. पुढे जाऊन शासनकर्त्यांची नवी पिढी राज्यात अधिक समानता आणण्यासाठी एक प्रयोग करते. सर्व वर्गातील लोकांना संधी देण्यासाठी एक संस्था उघडण्यात येते. त्यांच्यातून भविष्यातील श्रेष्ठ राजा किंवा राणी मिळवण्यासाठी त्यांना प्रशिक्षण दिले जाते. यातूनच निवड झालेला नवा राजा बॅलिस्टर बोल्डहार्टला (रिझ अहमद) राज्याभिषेक होण्याच्या काही मिनिटांपूर्वीच पलायन करावे लागते, कारण राणीचा मारेकरी म्हणून त्याच्यावर आळ घेतलेला असतो. चंचल स्वभावाची, आकार बदलणारी, अक्राळविक्राळ शक्ती म्हणून ओळखली जाणारी निमोना (क्लो ग्रेस मोरेट्झ) दुर्दैवी बॅलिस्टरला मदतीचा हात देते. ग्लोरेथच्या सर्व लोकांना सत्य उमगावे म्हणून निमोना आणि बॅलिस्टर अगदी साहसपूर्ण संघर्ष करतात. अशी ही साधी-सरळ कथा आहे.

निक ब्रुनो आणि ट्रॉय क्वेन दिग्दर्शित ‘निमोना’ची सिनेमॅटोग्राफी अफलातून आहे. मानव सध्या ज्या अवकाशीय गोष्टींचे भाकीत करत आहे, त्या सर्व गोष्टींसह भविष्यातील जगाची भव्य कल्पना अद्भूतपणे चितारली असल्याने हा चित्रपट प्रेक्षणीय झाला आहे. काल्पनिक आदर्श जगाच्या संस्कृतीच्या गाभ्याला हात न लावता भेदाभेद करण्यावर भाष्य करताना चित्रपटाचा फॉर्म बिघडू दिलेला नाही. रॉबर्ट एल. बेअर्ड आणि लॉयड टेलर यांची पटकथा अत्यंत बांधेसूद, रंजक अन् गंमतीदार आहे. या जॉनरमधील चित्रपटांना हवे असणारे सर्व घटक यात ठासून भरले आहेत. चित्रपट प्रेक्षकांना खिळवून ठेवतो आणि सतत येणारे अनिश्चित ट्विस्ट घेत राहतो. निमोना आणि बॅलिस्टरची अनोळखी-बेस्ट बडीज म्हणून केमिस्ट्री हे देखील चित्रपटाचे वैशिष्ट्य आहे. कथा जसजशी पुढे सरकत जाते, तसतसे प्रत्येक जण त्यांच्या विरोधात असलेल्या घटकांशी मिळतेजुळते घेत परस्परांचे सांत्वन करत शांतता प्रस्थापित करताना दिसतात. चांगले विरुद्ध वाईट या जुन्याच संकल्पनेवर आधारित असा हा चित्रपट आहे. डिस्टोपियन जगाची ही कथा टवटवीत तर आहेच; शिवाय मनोरंजक, आनंदी दृश्ये आणि साहसांनी भरलेली आहे. प्रेक्षकांच्या वेळेचा पुरेपूर मोबदला देणारा चित्रपट असं त्याला म्हणता येईल!

आता थोडंसं ‘डिलिट’ या मालिकेबद्दल. अलीकडे रिलीज झालेली थाई मालिका ‘डिलिट’ हा एक शो आहे जो ‘ब्लॅक मिरर’च्या प्रत्येक चाहत्याला आनंद देईल. ही मालिका एका विवाहबाह्य संबंधात असलेल्या जोडप्याबद्दल आहे, ज्यांना एक असा फोन सापडतो जो लोकांना हटवू शकतो. त्यांना अशा निवडी कराव्याच लागतात, ज्यामुळे ते दुसऱ्या दिवशी हटवले जाऊ शकतात किंवा मृत वा जिवंत होऊ शकतात. गाजलेल्या ‘ब्लॅक मिरर’ची ही थाई आवृत्ती असली, तरी याचं वेगळेपण त्यातील मांडणीत आहे. सामान्य कथासूत्र तेच असले, तरी मुख्य कल्पना अगदी रंजक आहे.

मोबाइलद्वारे माणसं डिलिट करण्याची कल्पना भन्नाटच आहे. या कल्पनेला भावनांच्या विविध छटा बहाल केल्यामुळे तिला जे स्वरूप प्राप्त झाले आहे, त्यातून अक्षरशः नवरसांची अनुभूती येते! मालिकेची नायिका असणाऱ्या लिलीला एक फोन गवसतो, जो लोकांना गायब करवतो. तिचे विवाहबाह्य संबंध असतात आणि तिला घटस्फोट घ्यायचा असतो. त्या दरम्यानच हे घडतं, कधी इच्छेने, तर कधी अनिच्छेने घडतं! यातून आणखीनच गुंतागुंत वाढणार आहे, याची तिला काहीच कल्पना नसते. पहिले दोन्ही भाग रहस्यमय आहेत, तर नंतरच्या भागांमध्ये इमोशनल गुंतागुंत वाढत जाते. सुरूवातच अगदी सॉलिड आहे. पार्श्वसंगीत नि छायाचित्रण अत्यंत जोरकस आहे. देखणा अभिनेता नॅट किचरिट याचा स्क्रीनवरचा प्रेझेन्स सतत लक्ष वेधून घेण्यासाठीच आहे की काय, असे वाटण्याइतका तो लोभस दिसतो! त्याच्यावरून नजर हटत नाही. लिलीच्या भूमिकेतील अभिनेत्री सारिका हिचा वावर पहिल्या फ्रेमपासून शेवटपर्यंत निखळ आनंद देणारा आहे. तिच्यात एक लडिवाळ भोळेपणा दिसतो. थाई अभिनेत्यांचे आकर्षण असणाऱ्यांसाठी ही सिरीज एक पर्वणी आहे.​​​​​​​

जिओ सिनेमावर रिलीज झालेला ‘सार्जंट’ हा रणदीप हुड्डाचा सिनेमा कमालीचा निराशाजनक आहे. निखिल शर्मा या तपास अधिकाऱ्याची ही कथा आहे. ड्रग सप्लाय आणि मर्डर मिस्ट्रीच्या केसमध्ये तो सपशेल अपयशी ठरतो, आपल्यावरील कलंक दूर करण्यासाठीचा त्याचा संघर्ष म्हणजे सार्जंट! कमालीची संथ कथा, अत्यंत ढिसाळ पटकथा, अनेक वेस्टर्न वेब सिरीजचा मसाला ढापलेली मांडणी, नावीन्याचा अभाव असणारे दिग्दर्शन आणि यांच्या भरीस भर म्हणजे विलक्षण कृत्रिम अभिनय.. सिनेमा कसा नसावा, याचे हे उत्कृष्ट उदाहरण ठरावे!

समीर गायकवाड
sameerbapu@gmail.com
संपर्क : 9766833283