सोनम वांगचुक यांच्या प्रकृतीची दिल्ली उच्च न्यायालयाला गंभीर चिंता; केंद्राला नियमित वैद्यकीय तपासणीचे निर्देश
साहस Times : लडाखचे सामाजिक कार्यकर्ते आणि शिक्षणतज्ज्ञ सोनम वांगचुक यांनी जंतर-मंतर येथे सुरू केलेल्या बेमुदत उपोषणाचा कालावधी १९ दिवसांवर पोहोचला असताना, त्यांच्या खालावत चाललेल्या प्रकृतीची गंभीर दखल दिल्ली उच्च न्यायालयाने घेतली आहे. त्यांच्या आरोग्य आणि सुरक्षेसंदर्भात दाखल करण्यात आलेल्या जनहित याचिकेवर सुनावणी करताना न्यायालयाने केंद्र सरकारला नियमित वैद्यकीय तपासणी करून आवश्यकतेनुसार तातडीने उपचार करण्याचे स्पष्ट निर्देश दिले.
सुनावणीदरम्यान केंद्र सरकारच्या वतीने उपस्थित सॉलिसिटर जनरल यांनी न्यायालयाला माहिती दिली की, सोनम वांगचुक यांच्या प्रकृतीवर सातत्याने लक्ष ठेवण्यात येत असून सरकारी डॉक्टरांकडून दररोज त्यांची आरोग्य तपासणी केली जात आहे. त्यांच्या आरोग्याबाबतची सर्व आवश्यक माहिती त्यांना तसेच त्यांच्या सहकाऱ्यांनाही नियमितपणे दिली जात असल्याचेही सरकारने स्पष्ट केले.
यावर न्यायालयाने प्रत्येक नागरिकाचा जीव अमूल्य असल्याचे नमूद करत, सरकारी डॉक्टरांकडून नियमित वैद्यकीय तपासणी सुरू ठेवावी आणि डॉक्टरांच्या अहवालानुसार आवश्यक वाटल्यास कोणताही विलंब न करता योग्य वैद्यकीय हस्तक्षेप करावा, असे निर्देश दिले. न्यायालयाने निरीक्षण नोंदवताना, “प्रत्येक नागरिकाचे जीवन महत्त्वाचे असून ते सुरक्षित ठेवण्यासाठी शक्य ते सर्व प्रयत्न झाले पाहिजेत,” असे स्पष्ट मत व्यक्त केले.
सॉलिसिटर जनरल यांनीही न्यायालयाच्या भूमिकेशी सहमती दर्शवत, सरकार प्रत्येक नागरिकाच्या जीविताला सर्वोच्च प्राधान्य देते, असे सांगितले. डॉक्टरांच्या सल्ल्यानुसार आवश्यक असलेली सर्व वैद्यकीय मदत उपलब्ध करून दिली जाईल आणि परिस्थितीनुसार तातडीने योग्य उपाययोजना करण्यात येतील, असे आश्वासन त्यांनी न्यायालयाला दिले.
जनहित याचिकेमध्ये सोनम वांगचुक यांच्या सातत्याने खालावत चाललेल्या प्रकृतीबाबत चिंता व्यक्त करण्यात आली होती. त्यावर उत्तर देताना केंद्र सरकारने सरकारी डॉक्टर आणि संबंधित तज्ज्ञांचे पथक त्यांच्या आरोग्यावर सतत लक्ष ठेवून असल्याचे सांगितले. आवश्यकतेनुसार सर्व वैद्यकीय सुविधा उपलब्ध करून देण्यात येतील, असेही सरकारने स्पष्ट केले.
सरकारच्या या भूमिकेची नोंद घेत दिल्ली उच्च न्यायालयाने समाधान व्यक्त केले. तसेच डॉक्टरांच्या वैद्यकीय मतानुसार योग्य वेळी आवश्यक उपचार आणि हस्तक्षेप करण्यात यावेत, असे निर्देश देत या जनहित याचिकेवरील सुनावणी पूर्ण करण्यात आली.
दरम्यान, सोनम वांगचुक यांच्या सुरू असलेल्या बेमुदत उपोषणामुळे देशभरातून चिंता व्यक्त केली जात असून विविध सामाजिक संघटना, पर्यावरणप्रेमी, शिक्षणतज्ज्ञ आणि अनेक मान्यवरांनी त्यांच्या प्रकृतीबाबत काळजी व्यक्त केली आहे.
