श्रीमंत संजीवराजेंना आमदार करण्याची लोकभावना शिंदे साहेबांपर्यंत पोहोचवू : मंत्री उदय सामंत
श्रीमंत संजीवराजेंना आमदार करण्याची लोकभावना शिंदे साहेबांपर्यंत पोहोचवू : मंत्री उदय सामंत
फलटण : “अतिरिक्त एमआयडीसीसाठी शेतकऱ्यांवर कोणतीही जबरदस्ती केली जाणार नाही. शेतकऱ्यांना योग्य आणि अपेक्षित मोबदला देऊनच एमआयडीसी उभारली जाईल,” अशी स्पष्ट ग्वाही उद्योगमंत्री उदय सामंत यांनी दिली.
फलटण येथे आयोजित शिवसेना मेळाव्यात ते बोलत होते. यावेळी त्यांनी मॅग्नेशिया कंपनीच्या विस्तारासाठी येत्या महिनाभरात एमआयडीसीमध्ये जागा उपलब्ध करून दिली जाणार असल्याचे सांगितले. या प्रकल्पामुळे मोठ्या प्रमाणावर रोजगारनिर्मिती होणार असल्याचा विश्वासही त्यांनी व्यक्त केला. अतिरिक्त एमआयडीसी मंजुरीबाबत सकारात्मक हालचाली सुरू असल्याचे त्यांनी पुन्हा अधोरेखित केले.
लोकशाही भारत न्यूजने तीन महिन्यांपूर्वी अतिरिक्त एमआयडीसी संदर्भातील आश्वासनाची बातमी प्रसिद्ध केली होती. त्याच पार्श्वभूमीवर उदय सामंत यांनी या विषयावर पुन्हा भाष्य केले.
फलटण परिसरात पोटॅशियम परमॅग्नेट निर्मिती करणारा जगातील तिसऱ्या क्रमांकाचा कारखाना कार्यरत असून, पश्चिम महाराष्ट्र आता केवळ साखर उद्योगापुरता मर्यादित न राहता रासायनिक उद्योगांसाठीही ओळख निर्माण करत असल्याचे त्यांनी सांगितले.
शिवसेना संघटनाबाबत बोलताना उदय सामंत म्हणाले, “एका लोकसभा मतदारसंघात १६ हजार ५०० पदाधिकारी निर्माण करणारा शिवसेना हा एकमेव पक्ष ठरेल.” शाखाप्रमुख हा पक्षाचा कणा असून त्याने पक्षाचे कार्य तळागाळापर्यंत पोहोचवावे, असे आवाहन त्यांनी केले. शाखाप्रमुख आणि त्यांच्या कुटुंबाच्या संरक्षणाची जबाबदारी पक्षप्रमुख तथा उपमुख्यमंत्री एकनाथ शिंदे घेणार असल्याचेही त्यांनी सांगितले.
यावेळी त्यांनी माजी पंतप्रधान अटल बिहारी वाजपेयी आणि ज्येष्ठ नेते शरद पवार यांनीही शिवसेनेच्या शाखा रचनेतून प्रेरणा घेत पक्षविस्तार केल्याचा उल्लेख केला.
दरम्यान, भाषणादरम्यान उपस्थित कार्यकर्त्यांनी “श्रीमंत संजीवराजे नाईक निंबाळकर यांना आमदार करा” अशा घोषणा दिल्या. त्यावर प्रतिक्रिया देताना उदय सामंत म्हणाले, “जे माझ्या हातात नाही त्याची जबाबदारी मी घेणार नाही. मात्र, आपली लोकभावना पक्षप्रमुख एकनाथ शिंदे यांच्यापर्यंत पोहोचवण्याची जबाबदारी मी आणि माजी खासदार राहुल शेवाळे स्वीकारत आहोत.”
या विधानानंतर उपस्थितांनी टाळ्यांच्या कडकडाटात स्वागत केले. कार्यक्रमाच्या शेवटी राज्यसभा खासदार ज्योती वाघमारे, माजी खासदार राहुल शेवाळे, चंद्रहार पाटील आणि उद्योगमंत्री उदय सामंत यांच्या हस्ते जिल्हा परिषद, पंचायत समिती आणि फलटण नगरपालिका निवडणुकीत विजयी झालेल्या नवनिर्वाचित सदस्यांचा सत्कार करण्यात आला.
