फलटण शहर गुन्हेगारमुक्त करण्यासाठी कठोर कारवाईची मागणी; भीम आर्मीचे पोलिस प्रशासनाला निवेदन
फलटण शहर गुन्हेगारमुक्त करण्यासाठी कठोर कारवाईची मागणी; भीम आर्मीचे पोलिस प्रशासनाला निवेदन
फलटण : शहरात दिवसेंदिवस वाढत चाललेले शहरीकरण, वाढती लोकसंख्या आणि त्यासोबत वाढणाऱ्या गुन्हेगारीच्या घटनांमुळे नागरिकांमध्ये भीतीचे वातावरण निर्माण होत असल्याची चिंता व्यक्त करत भीम आर्मी संघटनेने फलटण शहरात कठोर कायद्यांची प्रभावी अंमलबजावणी करण्याची मागणी केली आहे.
शहरातील वाढती गुन्हेगारी रोखण्यासाठी महाराष्ट्र संघटित गुन्हेगारी नियंत्रण कायदा (MCOCA) तसेच एमपीडीए सारख्या प्रभावी प्रतिबंधात्मक कायद्यांतर्गत कारवाई करण्यात यावी, अशी मागणी संघटनेने पोलिस प्रशासनाकडे निवेदनाद्वारे केली. सराईत गुन्हेगारांवर कठोर कारवाई करून त्यांना तडीपार करण्यात यावे, जेणेकरून शहरातील शांतता व कायदा-सुव्यवस्था अबाधित राहील, असेही निवेदनात नमूद करण्यात आले आहे.
फलटण शहर सुरक्षित करण्यासाठी शहरातील महत्त्वाच्या चौकांमध्ये व गर्दीच्या ठिकाणी अधिकाधिक सीसीटीव्ही कॅमेरे बसविणे, नियमित नाकाबंदी, कोंबिंग ऑपरेशन आणि संशयितांवर विशेष लक्ष ठेवण्याची गरज असल्याचे संघटनेने सांगितले. तसेच कायद्याचा धाक निर्माण होणे आवश्यक असून गुन्हेगारी, भीती आणि दहशतमुक्त फलटण निर्माण करण्यासाठी पोलिस प्रशासनाने ठोस पावले उचलावीत, अशी मागणी करण्यात आली.
या मागणीमुळे आता पोलिस उपअधीक्षक (DYSP) तसेच फलटण शहर पोलिस निरीक्षक कोणती भूमिका घेणार, याकडे संपूर्ण शहराचे लक्ष लागले आहे.
निवेदन देताना अजित संभाजी मोरे, सुनील पवार, तेजस भोसले, तुषार जाधव आणि सनी पवार उपस्थित होते.
