फलटण :- फलटण तालुक्यात पंचायत समितीच्या सभापती निवडीवरून मोठा वाद निर्माण झाला असून ओबीसी समाजात तीव्र नाराजी व्यक्त होत आहे. ओबीसी नेते प्रा. लक्ष्मण हाके यांनी पत्रकार परिषदेत बोलताना या निवडीवर गंभीर आक्षेप घेत, कायद्याचे उल्लंघन झाल्याचा आरोप केला आहे.
प्रा. हाके यांच्या मते, सभापती पद ओबीसी प्रवर्गासाठी राखीव असताना गैर-ओबीसी व्यक्तीची निवड करण्यात आली आहे. त्यामुळे ओबीसी समाजाचा अपमान झाल्याची भावना निर्माण झाली असून हा प्रकार घटनाविरोधी असल्याचा त्यांनी दावा केला.
या पार्श्वभूमीवर फलटणमध्ये ओबीसी समाज आक्रमक झाला आहे. आज सकाळी शासकीय विश्रामगृह येथे प्रा. हाके यांच्या उपस्थितीत ओबीसी बांधवांची बैठक पार पडली. बैठकीनंतर मोठ्या संख्येने उपस्थित कार्यकर्त्यांनी विश्रामगृह ते तहसील कार्यालय असा मोर्चा काढत तहसीलदारांना निवेदन दिले. यावेळी अनेकांनी आपली नाराजी आणि भावना व्यक्त केल्या.
प्रा. हाके यांनी सांगितले की, पंचायत समितीच्या अलीकडील निवडणुकीत ओबीसी समाजाचे नऊ सदस्य निवडून आले आहेत. तरीदेखील मूळ ओबीसी प्रतिनिधींना डावलून इतर प्रवर्गातील व्यक्तीला सभापती पद देण्यात आले, हे अन्यायकारक असल्याचे त्यांनी म्हटले. “ओबीसींसाठी राखीव असलेले पद ओबीसींनाच मिळत नसेल, तर त्यांनी जगायचे कसे?” असा सवाल त्यांनी उपस्थित केला.
तसेच, राजकीय नेते ओबीसी समाजाचा केवळ मतांसाठी वापर करत असल्याची टीकाही त्यांनी केली. राज्यात ओबीसी आरक्षण कमकुवत करण्याचे प्रयत्न सुरू असल्याचा आरोप करत, या प्रकरणाविरोधात लवकरच मोठे आंदोलन उभारण्याचा इशारा त्यांनी दिला.
