फलटण : फलटण उपजिल्हा रुग्णालयातील महिला डॉक्टरने पोलिसांच्या कथित त्रासामुळे आत्महत्या केल्याच्या दुर्दैवी घटनेने संपूर्ण फलटण हादरले आहे. या प्रकरणी सखोल चौकशी करून दोषींना कठोर शिक्षा व्हावी, अशी मागणी माजी खासदार रणजितसिंह नाईक निंबाळकर यांनी केली आहे.
नाईक निंबाळकर म्हणाले, “या महिला भगिनीने का आत्महत्या केली याचा तपास सखोलपणे व्हावा. त्या महिला डॉक्टरचा तसेच संबंधित दोन्ही पोलिसांचा मोबाईल चॅटिंग आणि सीडीआर रिपोर्ट तपासला गेला, तर अधिक सत्य बाहेर येईल. फलटणमध्ये घडलेली ही घटना कोणाच्याही मनाला वेदना देणारी आहे. ज्यांच्या पायी आत्महत्या झाली त्या नराधमांना कडक शासन व्हावे.”
तसेच त्यांनी पुढे सांगितले की, या घटनेचा खटला विशेष पथक नेमून फास्टट्रॅक कोर्टात चालवण्याची गरज आहे, जेणेकरून सर्व आरोपींना लवकरात लवकर शिक्षा होईल आणि अशा घटना पुन्हा घडणार नाहीत.
फलटण शहरात या घटनेमुळे संतापाचे वातावरण असून, नागरिक न्याय मिळावा अशी मागणी करत आहेत.
