फलटण : आयडियल इंटरनॅशनल स्कूलमध्ये शिक्षक दिन एक आगळ्यावेगळ्या उपक्रमाने साजरा करण्यात आला. या दिवशी विद्यार्थ्यांनी शिक्षक आणि शिक्षकेतर कर्मचाऱ्यांच्या भूमिका पार पाडत शाळेचा संपूर्ण कारभार सांभाळला. यामुळे विद्यार्थ्यांना जबाबदारी, व्यवस्थापन कौशल्य आणि नेतृत्वाचा प्रत्यक्ष अनुभव मिळाला.
शाळेच्या मुख्याध्यापिका डॉ. सौ. वैशाली शिंदे यांच्या मार्गदर्शनाखाली कार्यक्रमाचे आयोजन झाले. विद्यार्थिनींनी डायरेक्टर, मुख्याध्यापक, उपमुख्याध्यापक, विभाग प्रमुख (HOD), क्रीडा शिक्षक, संगीत व नृत्य शिक्षक, लिपिक, शिपाई आणि मदतनीस अशा विविध पदांच्या जबाबदाऱ्या स्वीकारल्या.
विद्यार्थी डायरेक्टर शर्व भोईटे याने शिक्षकांची बैठक घेत कामकाजाचे मार्गदर्शन केले. या टीमने शिस्तबद्ध पद्धतीने शाळेचे काम यशस्वी पार पाडले. शाळेचे डायरेक्टर शिवराज भोईटे व सेंटर हेड सुचिता जाधव यांनी विद्यार्थ्यांशी संवाद साधत त्यांच्या आत्मविश्वासाचे आणि जबाबदारीच्या जाणिवेचे कौतुक केले.
या उपक्रमातून विद्यार्थ्यांना शिस्त, वेळेचे नियोजन, निर्णयक्षमता आणि नेतृत्वगुण यांसारखी जीवनमूल्ये शिकायला मिळाली. शिक्षक म्हणून भूमिका निभावताना शिक्षण क्षेत्रातील व्यापकता आणि जबाबदारीची जाणीव झाली. हा अभिनव कार्यक्रम विद्यार्थ्यांसाठी अविस्मरणीय ठरला.
