फलटण :- फलटण ग्रामीण पोलिसांनी व्यावसायिक मत्सरातून अकॅडमी चालकाला गांजा आणि पिस्तूलाच्या खोट्या गुन्ह्यात अडकवण्याचा कट उधळून लावला आहे. या प्रकरणी पाच जणांना अटक करण्यात आली असून, मुख्य सूत्रधार मात्र फरार आहे. या घटनेमुळे संपूर्ण तालुक्यात खळबळ उडाली आहे.
मिळालेल्या माहितीनुसार, दि. २७ ऑगस्ट रोजी मौजे दालवडी येथे स्विफ्ट डिझायर कारमध्ये १८ किलो गांजा (किंमत ४.३० लाख), गावठी पिस्तूल आणि दोन जिवंत काडतुसे असल्याची माहिती पोलिसांना मिळाली होती. पोलिसांनी छापा टाकून गाडीची नपासणी केली असता हा मुद्देमाल आढळला. गाडीचे मालक रवींद्र कोलवडकर यांनी पोलिसांना सांगितले की, व्यवसायातील स्पर्धेतून त्यांना खोट्या गुन्ह्यात अडकवण्याचा कट रचला गेला आहे.
चौकशीत उघड झाले की, कोलवडकर यांचा माजी व्यावसायिक भागीदार कुमार उर्फ ज्ञानेश्वर परदेशी यानेच हा कट रचला होता. परदेशीने धमकी देत, टोळीच्या मदतीने गाडी बनावट चावीने उघडून त्यात गांजा व पिस्तूल ठेवले. पोलिसांनी जयेश जाधव, अनिल गजरे, ओंकार खराडे, रोहन एडके आणि मुसा शिंदे यांना ताब्यात घेऊन अटक केली. त्यांनी चौकशीत कबुली दिली असून, मुख्य सूत्रधार परदेशी फरार आहे.
या प्रकरणी कट रचणे, चोरी करणे आदी गंभीर कलमे दाखल करण्यात आली असून, अटक आरोपींना न्यायालयाने चार दिवसांची पोलीस कोठडी सुनावली आहे. अटक आरोपी अनिल गजरे हा यापूर्वीच्या ‘हनी ट्रॅप’ प्रकरणातही फरारी असल्याचे समोर आले आहे. या गुन्ह्याचा तपास पोलीस अधीक्षक तुषार दोषी, अपर पोलीस अधीक्षक डॉ. वैशाली कडुकर यांच्या मार्गदर्शनाखाली पोलीस निरीक्षक सुनील महाडीक करत आहेत.
