सातारा : रायगडावरील (Raigad) छत्रपती शिवाजी महाराजांच्या समाधीस्थळाजवळ असलेल्या वाघ्या कुत्र्याच्या समाधीवरुन गेल्या काही दिवासांपासून वाद रंगला आहे. माजी खासदार संभाजीराजे छत्रपती यांनी मुख्यमंत्री देवेंद्र फडणवीसांना पत्र लिहून, इतिहासात वाघ्या कुत्र्याचा कुठेही संदर्भ नाही, राम गणेश गडकरी यांच्या नाटकातून हे कुत्रे आले आहे. त्यामुळे, या कुत्र्याची समाधी हटवावी अशी मागणी त्यांनी केली होती. त्यानंतर, इतिहास संशोधक इंद्रजीत सावंत यांनी देखील वाघ्या कुत्र्याच्या समाधीला आक्षेप घेतला आहे. त्यानंतर, इतिहास अभ्यासक संजय सोनवणी यांनी वाघ्या कुत्र्याचा संदर्भ असल्याचे सांगत होळकर कुटुंबीयांशी त्याचा संबंध जोडला आहे. तसेच, हा कुत्रा इतिहासात होता, असेही त्यांनी म्हटले. त्यामुळे, वाघ्या कुत्र्याच्या समाधीवरुन चांगलाच वाद रंगला आहे. आता, खासदार आणि शिवाजी महाराजांचे 13 वे वंशज उदयनराजे भोसले (Udayanraje bhosle) यांनी ह्या कुत्र्याचा संबंध नसल्याचे म्हटले. तसेच, ब्रिटीशांकडून हा कुत्रा आल्याचेही त्यांनी सांगितले.
रायगड म्हटलं की तुम्हाला शिवाजी महाराजांची प्रतिमा समोर येते की कुत्र्याची प्रतिमा येते हे सांगा? असा प्रति सवालच उदयनराजेंनी उपस्थित केला. हा सगळा वाद ब्रिटिशांनी आणला आहे, हे असे लांब कानाचे कु्त्रे आपल्याकडे असतात का? ही सगळी ब्रिटिशांची कुत्री आहेत, असेही उदयनराजेंनी म्हटले. तसेच, वाघ्या कुत्र्याची समाधी विनाकारण इतिहासात घुसवल्याचे उदयनराजेंनी सूचवले आहे. दरम्यान, संभाजीराजे छत्रपती यांनी यासंदर्भाने पुरातत्व विभागाच्या महासंचालकांना एक पत्रही दिलं आहे. याआधीही अशी मागणी करणारं एक पत्र त्यांनी मुख्यमंत्री देवेंद्र फडणवीस यांना लिहिलं होतं. वाघ्या कुत्र्याचे इतिहासात कोणतेही पुरावे सापडत नसल्याने त्याची समाधी रायगडावरून कायमस्वरुपी हटवण्यात यावी, असं आवाहन त्यांनी पत्राद्वारे केलं होतं. पण, धनगर समाजाचे नेते लक्ष्मण हाके यांनी वाघ्या कुत्र्याची समाधी हटवण्यास विरोध केला. गरज पडली तर यासाठी तीव्र आंदोलन करू, न्यायालयात जाऊ असा इशाराही हाके यांनी दिला आहे.
शिवरायांच्या स्मारकासाठी गव्हर्नर हाऊस असावे
छत्रपती शिवाजी महाराजांच्या स्मारकासाठीचे गव्हर्नर हाऊस हे राजभवनाच्या ठिकाणी करावे अशी माझी मागणी आहे. या संदर्भात मी गृहमंत्री अमित शाह आणि मुख्यमंत्र्यांना विनंती करणार आहे. अरबी समुद्राच्या नजीक हे शिवस्मारक करायचं तर त्याकरता राजभवन ही चांगली जागा आहे. एवढी मोठी 45 एकर जागा आहे. राज्यपालांना राहायला किती जागा लागते. त्यामुळे हीच जागा मिळावी, अशी मी मागणी करत असल्याचे उदयनराजे भोसले यांनी म्हटलं आहे.
हेही वाचा
अधिक पाहा..
