सातारा; पुढारी वृत्तसेवा : राष्ट्रवादी काँग्रेस पार्टीचे अध्यक्ष खा. शरद पवार यांचा सातारा दौरा झाल्यानंतर मंगळवारी सातारा शहर व परिसरात राज्याचे उपमुख्यमंत्री ना. अजित पवार यांच्या शुभेच्छांचे फलक लागले आहेत. या फलकावर खा. शरद पवार यांचा फोटो आहे. मात्र त्यांच्या समर्थक खासदार व आमदारांचे फोटो गायब आहेत. या बॅनरवर फक्त सातारा जिल्हा राष्ट्रवादी काँग्रेस पार्टी असा उल्लेख करण्यात आला आहे. दरम्यान, राष्ट्रवादीकडून हे बॅनर लावले नसल्याचे सांगण्यात आले आहे. त्यामुळे या बॅनरमागील कर्ता धर्ता कोण? असा सवाल केला जात आहे.
खा. शरद पवार यांच्या दौर्यानंतर सातारा शहर व परिसरात मंगळवारी सकाळीच उपमुख्यमंत्री अजित पवार यांना शुभेच्छा देणारे फ्लेक्स लागले. या फ्लेक्सवर खा. शरद पवार, ना. अजित पवार, आ. रामराजे नाईक निंबाळकर, खा. प्रफुल्ल पटेल, सुनील तटकरे यांच्यासह मंत्रिमंडळात सहभागी झालेल्यांचे फोटो लागले आहेत. मात्र, जिल्ह्यातील राष्ट्रवादीचे शरद पवार समर्थक खासदार व आमदारांच्या फोटोसह राष्ट्रवादीच्या कार्यकारी अध्यक्षा खा. सुप्रिया सुळे यांच्या फोटोंना स्थान देण्यात आले नाही. बॅनरवर फक्त राष्ट्रवादी काँग्रेस पार्टी असे लिहण्यात आले आहे. जिल्हा सरचिटणीस राजकुमार पाटील यांनी हे फ्लेक्स राष्ट्रवादीने लावले नसल्याचे स्पष्ट केले आहे.
