मराठी मनोरंजन विश्वातील आघाडीची अभिनेत्री म्हणून मुक्ता बर्वे हिचे नाव आवर्जून घेतले जाते. मराठी नाटक, मालिका, चित्रपट अशा तिन्ही माध्यमांतून अभिनेत्री मुक्ता बर्वे हिने आजवर प्रेक्षकांचे भरपूर मनोरंजन केले आहे. आपल्या अभिनयामुळे नेहमीच चर्चेत असणारी अभिनेत्री मुक्ता बर्वे सध्या तिच्या ‘नाच गं घुमा’ या चित्रपटामुळे चांगलीच चर्चेत आली आहे. तिचा हा चित्रपट १ मे रोजी प्रेक्षकांच्या भेटीला आला आहे. सध्या हा चित्रपट थिएटरमध्ये चांगलाच धुमाकूळ घालत आहे. या चित्रपटातील मुक्ताच्या अभिनयाचे कौतुक केले जात आहे. सध्या मुक्ता बर्वे तिच्या ‘चारचौघी’ नाटकाच्या दौऱ्यानिमित्त परदेशात असून, तिला सध्या भारताची आठवण येत आहे. यानिमित्ताने तिने नुकतीच सोशल मीडियावर एक पोस्ट लिहिली आहे.
