वृत्तसंस्था, नवी दिल्ली
सेवा क्षेत्रातील चांगल्या कामगिरीच्या जोरावर, विद्यमान मे महिन्यात भारतातील खासगी क्षेत्रात लक्षणीय सक्रियता दर्शविणाताना, वर्षातील सर्वोच्च गती दर्शविणारी कामगिरी नोंदविली. गुरुवारी जाहीर झालेल्या आकडेवारीनुसार, भारतातील सेवा आणि उत्पादन खरेदी व्यवस्थापकांचा कल दर्शविणारा ‘एचएसबीसी इंडिया सर्व्हिसेस संयुक्त पीएमआय’ निर्देशांक एप्रिलमधील ५९.७ वरून मे महिन्यात ६१.२ वर पोहोचला. जो उत्पादन आणि सेवा दोन्ही क्षेत्रांमध्ये मजबूत विस्तार सुरू असल्याचे दर्शवितो. मागणीची मजबूत परिस्थिती, नवीन व्यवसायातील वाढ आणि सुधारलेल्या व्यवसाय भावनांमुळे ही वाढ झाली.
एप्रिल २०२४ नंतरची ही वाढ सर्वाधिक वाढ आहे. उत्पादनातील वाढीच्या गतीमध्ये किंचित घट झाली असली तरी सेवा प्रदात्या कंपन्यांनी १४ महिन्यांतील सर्वात जलद वाढ नोंदवली आहे. सेवा क्षेत्रामध्ये व्यावसायिक क्रियाकलाप आणि रोजगारात जलद विस्तार झाला. सर्व कंपन्यांनी स्थानिक आणि आंतरराष्ट्रीय बाजारपेठेतून नवीन व्यवसायाचा जोरदार प्रवाह नोंदवला आहे.
एचएसबीसी फ्लॅश इंडिया मॅन्युफॅक्चरिंग पीएमआय आउटपुट इंडेक्स एप्रिलमधील ६१.९ वरून मे महिन्यात किंचित घसरून ६१.४ वर आला आहे, जो उत्पादन क्षेत्राची कामगिरी किंचित घटल्याचे दर्शवितो. मात्र नवीन कार्यादेश, उत्पादन, रोजगार, पुरवठादारांच्या वितरण वेळा आणि खरेदीच्या साठ्यासाठी जबाबदार असलेला व्यापक एचएसबीसी फ्लॅश इंडिया मॅन्युफॅक्चरिंग पीएमआय एप्रिलमधील ५८.२ वरून किंचित वाढून ५८.३ वर पोहोचला, जो या क्षेत्राच्या आरोग्यात निरंतर सुधारणा दर्शविणारा आहे.
याव्यतिरिक्त, जानेवारीनंतर पहिल्यांदाच व्यवसाय आत्मविश्वासात सुधारणा झाली, ज्यामुळे भविष्यातील व्यवसाय संधींबद्दल कंपन्यांमध्ये आशावाद दिसून आला. कंपन्यांनी मागणीची मजबूत परिस्थिती, तंत्रज्ञानातील गुंतवणूक आणि वाढलेल्या उत्पादन क्षमतांमुळे ही वाढ झाल्याचे सांगितले आहे.
मात्र, विद्यमान महिन्यात किंमत वाढीचा दबाव देखील वाढला. एचएसबीसी फ्लॅश पीएमआय आकडेवारीने २०२४ च्या अखेरीपासून उत्पादन खर्च आणि इतरही शुल्कात वाढ नोंदवली आहे, ज्यामध्ये चलनवाढीची पातळी एप्रिल २०२४ नंतरच्या सर्वोच्च पातळीवर पोहोचली आहे.
