नाशिक – मयत वडिलांच्या बँक खात्यात दोन मिलियन डॉलर असून ही रक्कम काढण्यासाठी आपले बँक खाते वापरण्यास द्यावे, त्यापोटी मोठी दलाली देण्याचे अमिष दाखवत सायबर गुन्हेगारांनी शहरातील ७० वर्षांच्या वृद्धास साडेसहा लाखांना गंडा घातला. याबाबत मधुकर चिंचोले (७०, कॉलेजरोड) यांनी तक्रार दिली. सप्टेंबर २०२४ मध्ये रोझलिन एडवर्ड नाव सांगणाऱ्या संशयित महिलेने फोन, मेलवरून त्यांच्याशी संपर्क साधला होता.
आपल्या वडिलांचा मृत्यू झाला असून त्यांच्या बँक खात्यातील दोन मिलियन डॉलर मिळवून देण्यासाठी मदत करण्यास सांगितले होते. यासाठी त्यांना दलाली देण्याची तयारी दर्शवली. चिंचोले यांनी तयारी दर्शविल्यानंतर तिने तक्रारदाराची माहिती घेतली. नंतर त्यांना बनावट ई मेलवरून बँक तपशील पाठवले, जे बहुराष्ट्रीय बँक आणि रिझर्व्ह बँक ऑफ इंडियाशी मिळते जुळते होते.
एका बहुराष्ट्रीय बँकेच्या नावासारख्या इमेलवरून संबंधित बँकेत खाते उघडल्याचे सांगून या बँकेच्या खात्यात पाच मिलियन डॉलर जमा असल्याचे भासवले. हे पैसे काढण्यासाठी अन्य इ मेलवरून वेगवेगळ्या प्रक्रिया शुल्काच्या नावाखाली वेगवेगळ्या बँक खात्यात एकूण सहा लाख ४५ हजार ९३७ रुपये वर्ग करण्यास भाग पाडण्यात आल्याचे तक्रारीत म्हटले आहे.
एप्रिलमध्ये तक्रारदाराला काहीतरी गडबड असल्याचे लक्षात आले. कारण, संशयित महिलेने त्यांच्या फोनला प्रतिसाद देणे बंद केले. आपली फसवणूक झाल्याचे लक्षात येताच चिंचोले यांनी पोलिसात धाव घेतली. या प्रकरणी संशयित महिलेविरुद्ध सायबर पोलीस ठाण्यात गुन्हा दाखल करण्यात आला आहे.
