Nagpur Women Missing: पहलगाम हल्ल्यानंतर भारत-पाकिस्तान या दोन देशातील तणाव वाढला आहे. ऑपरेशन सिंदूरनंतरही पाकिस्तानच्या कुरापती सुरूच आहेत. भारतीय युट्यूबर ज्योती मल्होत्रा हिने भारताची हेरगिरी केल्याचा आरोप आहे. रियाणा पोलिसांव्यतिरिक्त, मिलिटरी इंटेलिजेंस (एमआय) आणि इंटेलिजेंस ब्युरो (आयबी) चे पथक हेरगिरीच्या आरोपाखाली अटक करण्यात आलेल्या युट्यूबर ज्योती मल्होत्राची देखील चौकशी करण्यात येत आहे. अशातच आणखी एक धक्कादायक घटना समोर येत आहे. नागपुरातील महिलाही पाकिस्तानात गेल्याचा संशय व्यक्त करण्यात येत आहे. 43 वर्षीय महिला काश्मीरमधून बेपत्ता असल्याचे समोर आले आहे. मुलाला इथेच सोडून ही महिला पाकमध्ये पळाल्याची शक्यता असून पाक धर्मगुरुच्या ऑनलाईन ओळखीतून महिलेने LOC पार केले असून शकते, असा अंदाज वर्तवण्यात येत आहे.
नागपूरच्या सुनीता जामगडे या महिलेच्या अचानक बेपत्ता होण्याच्या घटनेमुळे सुरक्षा यंत्रणांमध्ये खळबळ उडाली आहे. कारगिलच्या सीमेवरील शेवटच्या ‘हुंदरमान’ गावातून तिने नियंत्रण रेषा ओलांडून पाकिस्तानात प्रवेश केल्याचा संशय व्यक्त करण्यात येत आहे. सुनीता जामगडे ही नागपूरमधील संत कबीर नगर भागात राहणारी महिला असून, ती पूर्वी एका खासगी रुग्णालयात नर्स म्हणून काम करत होती.
ती 14 मे रोजी आपल्या 12 वर्षीय मुलासह काश्मीरच्या दिशेने निघाली होती. मुलाला थोड्याच वेळात परत येते असे सांगून सोडून दिले आणि त्यानंतर तिचा काहीही थांगपत्ता लागलेला नाही. स्थानिक नागरिकांनी हा मुलगा एकटाच फिरताना पाहून त्याला तातडीने लडाख पोलिसांच्या हवाली केले. सुनिता ही काही काळापासून पाकिस्तानमधील एका धर्मगुरूच्या संपर्कात होती. त्याच्यासोबतच्या ऑनलाइन संभाषणांमुळे ती मानसिकदृष्ट्या प्रभावित झाली होती, असा संशय आहे. मात्र महिला मानसिक रुग्ण असल्याचा दावा तिच्या आईने केला आहे.
ज्योतीच्या हेरगिरी कनेक्शनची तपासणी
युट्यूबर ज्योती मल्होत्रा यांना पाकिस्तानसाठी हेरगिरी प्रकरणात अटक करण्यात आली आहे. त्यांच्यावर संवेदनशील माहिती पाकिस्तानच्या गुप्तचर यंत्रणांना पुरवल्याचा आरोप आहे. दिल्ली पोलिसांच्या विशेष कक्षाने ही कारवाई केली असून, या प्रकरणात अधिक तपास सुरू आहे. ज्योती मल्होत्रा यांच्याकडून काही महत्त्वाची कागदपत्रे आणि इलेक्ट्रॉनिक उपकरणे जप्त करण्यात आली आहेत. पोलिसांनी गोपनीयतेच्या कारणास्तव अधिक माहिती देण्यास नकार दिला आहे.
